Tunjuk jari patah dijamah laki

MIRI: Siku lelaki tukang nganjung barang kemari ditangkap polis pengudah dipelaba nyamah bini iya ba sebengkah penusah ke nyadi ba Desa Senadin kena Hari Enam tu tadi.

Ba penusah ke nyadi urung pukul 11 pagi malam, saspek peranak menua tu beumur 25 taun ngeransi lalu ngemakalka bini iya empu.

Ketuai Polis Pelilih Miri ACP Lim Meng Seah ngenukuka penusah nya madah, kebuah penusah nyadi laban bisi pekara ti ngasut seduai charut.

“Maya belaya, tunjuk jari anak sepiak kiba indu nya dipulaska laki iya kelimpah mua iya sepiak kiba mega dibukut.

“Berindik ari tunjuk jari anak indu nya ke majak kembai pengudah diurut, indu nya terus nganjung diri berubat ngagai Sepital Columbia Asia,” ku iya nengah sebengkah penerang.

Tandu iya, pengudah x-ray dipejalai, doktor ngenukuka tunjuk jari anak indu nya sepiak kiba udah patah lalu indu nya dibai ngagai Sepital Besai Miri ngambi diperubat baru.

Nitihka penerang, saspek mujur ditangkap kemari urung pukul 12.44 tengah hari ba Lorong Palma 3 ditu.

Kes dipansik nitihka Seksyen 325 Kanun Keseksaan (KK) laban ngujungka bakal kelimpah Seksyen 326A kanun ke sama laban ngujungka bakal kelimpah ngena senjata.

Kes nya dipansik nitihka Seksyen Seksyen 18A Akta Keganasan Rumah Tangga 1994.