Tupi jani ngena chara moden

BALINGIAN: Pengawa nupi jani ngena chara moden ulih nyadi siti dagang besai ba nengeri tu.

Sapit Kepala Menteri Datuk Amar Douglas Uggah Embas madahka ba taun 2019, nengeri tu udah ngeksport lebih RM80 juta babi enggau produk dagin jani ngagai Singapore.

“Diatu kitai semina eksport 1,200 iku jani idup ninting minggu ke Singapore nitihka peminta sida.

“Industri tu agi mayuh alai ulih ngerembai lalu kami benung beratika sebengkah endur dikena pengawa pemansang ke baru,” ku iya.

Uggah ti mega nyadi Menteri Betanam Betupi Moden, Tanah Adat enggau Pemansang Kandang Menua madah munyi nya ba program betanam betupi begulai enggau komuniti di Rumah Gansau Antas, Sungai Arip ditu, kemari.

Nangkan nya ku iya, ladang nupi jani moden ti keterubah di nengeri tu ba tanah pemesai 804 hektar di Pasir Putih Simunjan bisi lebih 50,000 iku jani.

“Kitai nadai dirampit sakit Kaki enggau Mulut lalu ke diatu African Swine Fever benung ngerekai ba mayuh menua di Asia.

“Tu siti pengelebih kitai, lalu kitai mega bisi mayuh tanah ti ulih dikemansang ba pengawa tu,” ku iya.

Berebak enggau nya, Uggah madahka dua ladang baru diperambu deka dibuka di Kelawit semak ditu enggau Samarakan di Bintulu lalu iya minta sida ke ngempu tanah meri sukung ngagai pekara nya.

Pemesai lebih 500 hektar tanah di Kelawit enggau lebih 1,000 hektar di Samarakan udah dipansik sida.

Pemansang ba kedua bengkah tanah nya deka dipejalaika pemeranak puku swasta enggau kerejasama kompeni ladang babi ke diaku.

“Nya alai aku minta kita berandau enggau bala ketuai sereta ejensi bekaul enti kita deka nemu enggau silik pekara tu.

“Betanam betupi moden enda ngeruga pemeresi rampa menua tauka meri bekau ngagau pengerai sereta pengidup laban ladang tu deka diatur ngena chara ti betul,” ku iya.

Ku Uggah, sebengkah atur ti terit pasal pekara tu meseti dititih lalu ladang baru tu ulih numbuhka pengawa puang ngagai peranak semak enggau dua menua nya.

Ba lansa ke sama, iya madahka penyampau anak jani ke deka diagih ngagai peranak rumah panjai ke minta ngagai Opis Betanam Betupi enda chukup kelebih agi sida ke deka nupi jani kediri.

“Kami deka matih sekeda peranak menua tu kelebih agi ba pengawa artificial insemination dikena mutarka penanggul tu,” ku iya.

Uggah mega mantaika konsep betanam betupi koden enggau betanam betupi chara fertigasyen (ngena chara ai ujan enggau sistem tebuka) ngagai peranak menua nya ti udah diperambu di Selangau.

Udah nya, iya meri geran penyampau RM20,000 ngagai Komiti Pemansang enggau Pengelikun Genturung Pendiau (JKKK) sereta RM2,000 ngagai belanja Biro Indu rumah panjai nya.

Suara Sarawak