SARATOK: Dua pintu peranak Rumah Nyuak, Nanga Maras Krian tusah ati beratika kebun diri ke suahh kena penusah bah .

Siku orang bempu kebun Indat Ansu,63 taun madah iya bisi bendar pengirau ketegal ai ti tekadang ba kebun iya lubah surut diumba diatu hari suah ujan.

“Penanggul ampuh bah tu kebendar nyadi laban kelebat ba seberai jalai kebun ditu udah alit laban tusur tanah sungkur lipan kunteriktor ngaga jalai ditu.

“Ba bulan Februari tu tadi ketiga kali aku udah ngeripot penanggul tu nuju Pemesai Opis Besai Pelilih Saratok (DO).

“Dulu suba udah ga aku nganjung gambar nuju Opis DO,udah nya kedua kali pinta sida baru ga gambar sama enggau ketiga kali tu tadi.

“Nitih penerang dipadah Opis DO suba, penanggul tu ukai tanggungpengawa sida tang baruh kuasa kunteriktor ti diberi tanggung pengawa ngaga jalai Ulu Krian diatu.”ku iya.

Siku agi orang beempu kebun iya nya Uding Juk Ing,36,mega senuntun penemu enggau Indat lalu ngarap ke penanggul jampat teputar.

“Enam pun udah sawit aku mati laban bah tu,enti ulih minta sebarang ejensi tauka piak bekaul baka sida kunteriktor ngaga jalai tu ulih mantu kami duai.

“Aku bisi bendar pengirau ati nangi ke ai tu majak kembai lalu ngujung ka mayuh agi pun sawit, getah enggau lada ba dua bengkah kebun besemak ditu mati.”ku Uding maya dirandau pemberita maya ngabas kebun sawit iya pagi kemari.

Ungkup penerang,kebun Uding enggau Indat ti sama berimbai bisi ngembuan urung 400 pun lada,50 pun getah kawin enggau 200 pun sawit sereta nyentuk sehari tu sepenyampau enam pun sawit udah mati ti ulih ngeluar ke asil setengah tan sekali ngarang.