Tusah ngiga salur darah, giga lutur senior

IPOH : Lutur tauka misi ke enda mujur tetemuka salur darah anak mit maya nuchuk jarum tauka deka ngambi darah patut minta bantu orang bukai tauka sida ke lebih senior.

Sapit Menteri Pengerai, Dr Lee Boon Chye enda ngenggai endang tusah ngiga salur darah anak mit ngena jarum laban nya mit tang bisi atur ditetap bekaul enggau pekara nya.

“Nyema nadai tetemuka salur darah ba anak mit maya deka nuchuk jarum nyadi patut minta bantu orang bukai tauka sida ke lebih senior lalu ukai majak nguji sampai 10 kali.

“Nyema nguji kedua kali enda mujur, sida enda tau nguji nuchuk jarum sampai ketiga kali,” ku iya madah ngagai pemberita pengudah bejadika Program Hari Aids Sedunya Rengat Nasional 2019 di Kinta River Walk ditu kemari.

Dr Lee nimbal penerang ke dikerembai nengah Facebook bekaul jaku siku indu ti mandangka gambar jari anak mit baru ada bisi bekau 10 kali abi tuchuk jarum dipadah dikereja lutur belatih maya deka ngambi darah anak iya.

Nerang silik, Dr Lee madah Opis Menteri Pengerai deka mansik pekara nya.– BERNAMA