Tusun tuai rumah panjai Emplaie Ulu, Krian

Sejarah tauka tusun pekara ti nyadi maya jeman kelia sigi beguna bendar nyadika tengau sereta malin kelimpah beguna bendar ngambi nyadika pengingat lebih agi ungkup rebak baru ti kurang mereti senentang tuju tauka kuing sesebengkah pekara nyadi ba siti-siti pelilih menua, kampung jerung sereta genturung pendiau.

Kelimpah ari rindu macha, ninga enggau nulis cherita lama, entara tuju penulis ngerembaika cherita lama awakka bisi dirikod ungkup anak uchu jemah.

Serak tu penulis mai mensia mayuh nemuai ngagai rumah panjai kami di Emplaie Ulu ke dipegai Batang Melupa, Krian, Saratok.

RUMAH EMPLAIE

Terubah suba, kami bela berumah dalam sebuah rumah panjai iya nya rumah panjai Emplaie sebedau ke bepechah dua. Bekau ari nya diatu bisi dua buah rumah panjai Emplaie iya nya Emplaie Ili enggau Emplaie Ulu.

Berengkah ari nya bala ti nitihka Jantai Renggian (niang aki penulis) belabuh ngati ke diri lalu ngentak rumah baru urung taun 1960 pengudah lama ngenduh ba dampa di Lubok Utey.

Nya alai, diatu mensia ke nampung tauka ngentak baru nyau majak nambah ngujungka rumah majak panjai sepanjai ari pengawa beranak betelesak kelimpah bisi kaban belayan ari menua bukai mega bisi datai nampil.

Diatu penyampau semua peranak rumah panjai tu bisi 26 pintu bilik.

Niang Ajie Dullah

TUAI RUMAH

Munyi ku sekeda genteran leka biau kitai Iban bemunyi Charik labung batik ganti tampung wi, padam bulan ganti matahari, parai sida ketuai ganti tubuh kami.

Baka nya mega enggau gintir pangku pengawa nyadi tuai rumah Emplaie Ulu pengudah pemidang pematak berumah iya nya niang Jantai Renggian. Lepas Jantai diganti Ajie Dullah (niang), Tadong Jamba (niang), Uyak Ansi (niang), ex-kaunselor Jinggan Lanchang (niang), Dana Tandang, (75) enggau diatu Tr Gending Danggat, (54) iya nya siku ketuai baru dipadu mangku pengawa kena 1 June tu tadi.

Munyiku sempama Laut, sekali ai bah sekali nya mega pasir berubah, peranak Emplaie Ulu kira benasit laban ulih sama ampit ngasaika pemansang buah merdeka baik nya ari perintah besai tauka perintah nengeri.

PEKARA PEMANSANG

TR BARU…TR Gending Danggat

Tu mega berekat ari penyiru bala pengari rayat sitak tu suba kenyau ari pegai niang Datuk Seri Peter Tinggom Kemarau lalu diatu rumah panjai tu udah mujur disambung enggau bekal kuasa karan ari Sesco, ai beresi, jalai alun belakin nuju rumah panjai sereta pemadu beguna ba dunya teknologi diatu iya nya arus internet ti menyana sereta laju.

Ba pelajar sekula,peranak Emplaie Ulu mega sigi naka ulih sereta enda mudah ningkil diri ngapa nyengula sereta seruran meri peransang ti beguna nuju anak sida.

Berindik ari pengekih nya,diatu mayuh peranak asal rumah tu mujur nembu pelajar sida nyentuk ke Universiti kelimpah ari palan belajar bukai ba selampur menua tu.

Pia mega, mayuh peranak asal udah kala mangku pengawa nyadi ketuai ba opis perintah, kompeni besai di serata menua kelimpah bulih pengawa perintah baka pengajar enggau kerani.

Nama rumah panjai Emplaie Ulu mega kala nyadi buah mulut ketegal pemujur Dr Spencer Empading Sanggin nyadi anak Iban ke keterubah ari Melupa bulih gelar Doktor Falsafah (PhD) pengudah abis belajar ari North Carolina State University, USA taun 1993. Diatu iya agi gawa nyadi Profesor ba Unimas. Kala mega dipadu nyadi Dekan Fakulti Sains Sosial, Unimas ari taun 2008-2013.

Baka rumah besemak, pengawa betanam betupi bumai betaun mengkang dikemeran lalu nyadi siti ari jalai penatai pemisi ruang bilik kelimpah belelang gawa ke mengeri.

Lansa sejarah pumah panjai Emplaie Ulu datai ari pengingat Injan Tadong, 65 taun ke mega anak tuai niang ex-Tr Tadong sereta ari Prof Dr Spencer.

Prof Dr.Spencer Empading Sanggin

 

KENANG…Maya ngintu Gawai Dayak taun 1993.

 

KENANG…Maya ngintu Gawai Dayak taun 1993.

 

DIATU…Rumah panjai Emplaie Ulu 2020.