KUCHING: Penumbuh TVS mujur muka peluang pengawa puang ngagai nembiak rebak baru enggau muka jalai ungkup pengemeran industri kreatif mantaika asil keranjai jari sida.
Tuai Pemesai Eksekutif (CEO) TVS Suhaimi Sulaiman madahka industri pengerembai (penyiaran) di Sarawak balat dinamik.
“Sebedau TVS, pengemeran industri kreatif menua nadai palan endur mantaika asil keranjai jari sida.
“Tang lebuh pelasar tu digaga, kami nerima mayuh buah runding enggau keretas keraja raban pengemeran industri tu ngaul diri baka lebuh Hari Raya tu tadi kami ngeluarka telemovie Puasa Ocek-ocek ti digaga Iqbal Harun enggau Ain Shuhada,” ku iya.
Suhaimi bejaku munyi nya lebuh dirandau Suara Sarawak ba opis iya di Cityone ditu, ensana.
Ku iya, telemovie tu balat dikerindu mensia mayuh tang pekara ti balat dikemegahka iya nya telemovie tu digaga anak Sarawak empu.
“Kami di TVS empu mega bisi ngaga telemovie ti diterbitka produksyen tu empu (internal) asil ari keranjai jari Ikmar Sharbini iya nya siku anak Sarawak ti chukup kreatif.
“Iya ukai semina nemu ngedit video, iya mega nemu nyadi direktor enggau nulis skrip.
“Ari nya, kami meda pelasar stesyen televisyen tu ulih ngaul komuniti sereta ulih ngeluarka program ti manah,” ku iya.
Tandu iya mega, sida udah nyikap diri deka mansang ke mua ngambika isi penerang (content) ulih mantu ekonomi menua.
“Tu endang pelasar Kepala Menteri (Datuk Patinggi Abang Johari Tun Openg) lalu endang udah mega nyadi visyen iya.
“Uji kitai meda menua Korea, menua nya maju laban K-Pop enggau drama ngujungka program sida tu dikerembai ba serata dunya.
“Nya alai, nadai salah enti Sarawak mansang nunda menua tu ngerembaika pemaik ti sebaka,” ku iya.
Tandu Suhaimi, agi bisi pekara dalam stesyen televisyen sida ti patut diseruri ngambika meri empas kualiti ti pemadu manah ngagai mensia mayuh.
“Bungkur pemaik ari penumbuh TVS tu besai, kami ukai semina meri peluang ngagai nembiak tang mega meri peluang ngagai produksyen menua ngaga isi penerang ti deka dibantaika sida.
“Kelimpah ari nya, raban penyendia servis katering, dagang perengka pengangkut enggau ke bukai mega nerima empas ti sebaka.
“Taja bedau setaun ditumbuhka, TVS udah meri pangka besai ngagai raban industri bukai ngerembaika dagang sida,” ku iya.
Nangkan nya, iya mega madahka mayuh nembiak rebak baru ti gawa ba TVS endang nembiak ti baru udah tembu sekula pelajar tinggi.
“Semina 20 peratus pengereja pengawa TVS ti ngembuan penelaba ngaul diri dalam produksyen lebuh aku datai ditu taun siti tu tadi.
“Tang 80 peratus ke bukai ari sida nya endang nembiak baru magang ti nadai ngembuan peneleba dalam bidang tu.
“Taja pia, aku gaga laban sida bisi semangat deka belajar sereta aus ke pemujur laban sida andal chap TVS tu terus mansang ke mua,” ku iya.
Iya madahka dalam timpuh ti pandak, raban pengereja pengawa ba TVS lengkas belajar sereta efisyen lebuh gawa.
