Ubah bepanggai ba jari pengundi

ENGKILILI: Rayat patut pintar beratika ubah politik ke bisi nyadi di Sarawak jam ke diatu, ku Kaban Kunsil Nengeri (Adun) Engkilili Dr Johnical Rayong Ngipa.

Iya madah, pengundi patut berani ngaga ubah ba sentang polisi ti enda ngelantangka ati sida.

“Nyema kitai deka meda ubah nyadi nya patit bepun ba jari kitai empu. Rayat patut berani pansut ari zon lantang lalu milih bagi parti baru ke bisi liabiliti enggau agi nadai sebarang palit ulah enda manah ba sentang kuasa,” ku iya.

Ku iya, rayat patut berani ngubah pendiau diatu nyema iya diasai medis, tauka nadai meri penguntung ngagai rayat.

Dr Rayong madah munyi nya rambau pengerami Merarau nyerumba bejadi siling Rumah Bulie Atin, Lidong Pandak, Lidong ditu apin lama ke udah.

Kenu ku iya, munyiku jaku sempama Melayu, ‘kalau tidak dipecahkan ruyung manakan dapat sagunya’, nya alai rayat patut berani ngaga ubah nguji mindah ngagai ‘penepan’ baru.

“Reti nya, pilih mih Parti Sarawak Bersatu (PSB) laban ditu parti ungkup semua bansa alai kitai ngenduh…ukai ukai ngelaban nyadi penyakal tang nyaup nirika perintah baru ke lepau ari liabiliti tauka sebarang pengawa ke enda dikerindu,”ku iya.

Tandu Dr Rayong ke mega Ketuai Nembiak PSB, parti tu diatu benung berati chalun ke bisi penau ba penuduk ke dikeandal ulih menang.

“Laban ti nyadi parti ngati kediri, PSB tentu deka ngeringka semua hak Sarawak ke udah lama diambi perintah besai nyengkaum pekara dlam MA63, O&G 1957, imigresen, pelajar kelimpah peluang gawa,” ku iya.

Kenu ku iya taja pemutus diasai berat tang nya enggai nyadi enda digaga ke pemaik semua rayat Sarawak.

“Genap pemutus tentu bisi kebuah tang laban PSB deka nyadi penampak ngujungka kami ngereja semua tu..kami gawa ungkup rayat Sarawak lalu ukai ungkup diri empu” ku iya.

Berebak enggau nya, Bulie nyadaka sukung penuh ngagai Dr Rayong enggau PSB.

“Rayat Engkilili agi begunaka Dr Rayong ngarika rayat laban iya siku ketuai ke bagas ngelawa rayat, nyamai enggau berandau kelimpah nemu penusah ke ditapi rayat,” ku iya.

Ku iya, naka tu pengundi di Dun Engkilili empai meda chalun ke ulih ngalahka pengawa manah digaga Dr Rayong.

Pengerami nya ngelai siling rumah Bulie ke baru tembu digaga ngena agih RM100,000 ari MRP ba taun 2018.

Ba pengerami nya mega, Dr Rayong bisi nyuaka chek RM3,000 ngagai JKKK Lidong Baru Betong, JKKK Lidong Pandak, JKKK Pelasok Betong, JKKK Kampung Issu Bangat Betong, PIBG SK St. Alphonsus enggau PIBG SK Ng. Menjuau.

Suara Sarawak