KUCHING: Sarawak meseti ngubah chara pengawa dagang ari semina ngatur aum ti meri pangka ba dagang temuai ngagai pemaik rentayan dunya, ngulih puku enggau matak raban bepenau baru.

Premier Sarawak, Datuk Patinggi Tan Sri Abang Johari Tun Openg madah, pekara ti suah dikereja rantau tu semina ngemerat pengawa mai pangka ngagai dagang temuai antarabansa enggau peluang ekonomi nengah pengawa dagang.

“Tang chara baru diatu enti kitai ngatur pengawa dagang, bala tuai dunya deka bekunsi penemu sida sereta meda pekara kereja kitai ba Sarawak.

“Serikat enggau pemeranak puku pen deka datai.

“Tu meh peluang kitai ngena pemaik rentayan dunya, nyamin puku serungkai enggau matak raban bepenau baru.

“Pekara tu mega ulih meransang industri ti deka mantu Sarawak nyapai nengeri maju enggau ngembuan penatai pemisi besai,” ku iya.

Abang Johari mansutka jaku nya rambau Anugerah Anak Sarawak Ke-10 ba Hotel Imperial, ditu malam ensanus.

Bekunsi chunto chara baru nya, iya madah, pengawa ngatur Aum Karbon Asia ba bulan March tu tadi mujur matak urung 400 deligit nyengkaum bala pemeranak puku enggau pemaju industri karbon.

Ku iya, raban nya deka nemu silik chara Sarawak ngemansangka industri ngumpul, ngena enggau nyimpan karbon (CCUS).

“Pekara diulih Sarawak ukai semina peluang pengulih ekonomi tang nyadi pemungkal dikena kitai nyingkang jauh sereta nempa peluang rayat besemekih enggau dunya.

“Taja pia, enti kitai semina bepanggai ba aum tauka pengawa dagang ngena chara lama, kitai enda ulih ngasai pemaik ti besai agi ari pekara tu,” ku iya nyemetak.

Iya mega bela muji raban BESarawak ti ngatur anugerah nya enggau pengeransing sida nempa nengeri tu nyadi palan ditapat bala pemeranak puku nengah pengawa ngatur bemacham pengawa dagang tikas dunya.