BINTULU: Pekebun mesti nguna teknologi betanam betupi moden dikena nambahka produktiviti pemansut asil bekebun.
Nya kebuah, Menteri Betanam Betupi Moden enggau PemansangWilayah Sarawak, Datuk Seri Dr Stephen Rundi Utom dekaka raban pekebun ba sitak Dun Kemena betanam betupi chara moden dikena nambahka asil bekebun sida.
“Kitai mesti ngembuan runding kreatif enggau inovatif nguna chara moden ba pengawa betanam betupi ngambi bulih asil enggau untung lebih,” ku iya nerang.
Rundi mansutka jaku nya pengudah nyuaka chek Projek Mit Pemansang Menua Pesisir (MRP) ungkup Dun Kemena, ensana.
Bisi 20 iku penerima ngarika Komiti Pemansang enggau Pengelikun Genturung Pendiau, Raban Nembiak enggau Gerempung Indu rumah panjai enggau genturung pendiau, kelab, serakup enggau gerempung ukai dikuasa perintah (NGO) Dun Kemena nerima chek MRP penyampau RM200,660.
Lebuh bekenaka teknologi moden, iya pechayaka raban pekebun ulih ngelimat jam enggau kurang penguna pengereja kelimpah ulih nambahka produktiviti.
Ku iya, raban nya mesti ngubah chara betanam betupi ungkup diri empu lalu ngalih ngagai pengawa betanam betupi chara moden ke ulih untung besai.
Adun Kemena nya mega minta pekebun ngerebut peluang penanggul ‘Food Security’ ke nyadi dalam menua lebuh nyerungkai pemansut pemakai besai nengah chara bekenaka teknologi pemadu baru.
Nambahka nya, Rundi ngarapka Serakup Orang Bumai Pelilih Menua ulih dikemansang dikena mantu pekebun mit ari sukut ngelakuka asil utai tanam nyengkaum Gerempung Orang Bumai Menua.
