BARIO: Pengawa ngubah baru Adat Kelabit 2008 endang patut ngambi semua pekara ba baruh adat nya seruran engkeman.
Sapit Menteri ba Opis Premier Sarawak (Pengereja Pengawa, Imigresyen enggau Pengawa Matau Projek), Datuk Gerawat Gala madah, nya dikena ngalus ke agi pekara ti udah bisi ngambi lebih komprehensif.
“Pekara tu endang beguna ngagai Kaunsil Adat Istiadat Sarawak (Mais) ngambi sida ulih mansik enggau nusun baru Adat Kelabit 2008.
“Nya alai, kitai ngarap Tuai Komuniti enggau Tuai Raban Bansa (KMKK) meri kerejasama penuh ngagai Mais.
“Kebuah pia ngambi pengawa ngalus ke agi adat tu lanchar,” ku iya.
Gerawat nibar jaku nya ba sebengkah penerang ti dipansutka Unit Komunikasyen Perintah Sarawak (Ukas).
Iya ti mega Adun Mulu madah, endang amat bisi sekeda pakara dalam adat nya udah enda engkeman agi.
Nya alai, iya beterima kasih ngagai bala penyereta seminar ketegal pengekih sida bejalaika pengawa ngubah adat nya.
“Adat ukai semina mungkur main asal tang tu nyeremin ke pengelala enggau gaya idup komuniti baka ti dikena nyentuk ke sehari tu.
“Ambi ke chunto baka Adat Asal Sabah enggau Sarawak ti diaku dalam Konstitusyen Malaysia, enti enda dikena kitai enda diau ditu lemai tu,” ku iya.
Nya alai, sekeda penanggul udah dikelala sepanjai ngatur Seminar Adat Kelabit 2008 (Nusun enggau Ngubah Adat), ditu empai lama.
Taja pia, pekara nya enda ngelabuhka semangat KMKK sitak Bario ti chakah mansik bup adat nya ngambi genap seksyen dalam adat nya seruran engkeman.
