KUCHING: Opis Menteri Pengerai Mensia Mayuh, Pengawa Berumah enggau Perintah Lokal dipelaba mantaika ubah Ordinan Bangunan Sarawak 1994 ba Aum Kunsil Nengeri (DUN) bulan Oktober tu.
Menteri nya ti mega Sapit Premier Sarawak Datuk Seri Dr. Sim Kui Hian madah, ubah tu nyengkaum ngelekat kereban pengelala sebun ba genap rumah baru.
“Opis menteri udah dipinta mansik ordinan tu dalam agi sebedau dibantai ngagai Luyar Nengeri Sarawak ngambi diubah.
“Kami nerima penerang ari opis bomba enggau raban profesional baka arkitek enggau ke bukai ba pekara tu,” ku iya.
Kui Hian bejaku munyi nya ba aum pemberita pengudah bejadi Kimpin Pengelikun Rumah Angus Serimbai Gawai Dayak 2023 enggau Pra Ngelanchar Hari Malaysia Community Fun Run 2023 di Farley Supermarket barang ditu, tadi.
