Ubah peragam, Amanah ukai parti Semenanjung

KUCHING: Parti Amanah Negara (Amanah) pampang Sarawak deka bebendar ngubah peragam runding rayat ti suah ngumbai parti nya semina parti nasional (Semenanjung).

Presiden parti nya, Mohammad Sabu tauka Mat Sabu madah agi bisi rayat menua tu ti mengkang ngumbai Parti Amanah tu semina parti Semenanjung Malaysia.

“Kitai ngembuan tanggungpengawa ti chukup besai iya nya ngubah runding rayat bekaul enggau penatai parti tu.

“Nya siti ari pengawa ti pemadu besai beguna sebedau pengawa bepilih kelimpah ari ngembuan komiti dikena bejalaika parti tu,” ku iya.

Mat Sabu madah munyi nya lebuh bejaku bejadika Aum BPR Parti Amanah Menua Nengeri Sarawak bepalan ba sebuah hotel ditu, tadi.

UBAH RUNDING…Mohammad Sabu (tengah) nerang ngagai pemberita pasal peragam runding ngumbai Amanah parti Semenanjung patut diubah. – Gambar Nadim Bokhari

Nangkan nya ku iya, pengawa ngubah runding rayat ukai pekara ti muntang.

“Pekara tu endang deka makai timpuh ti lama.

“Lebuh tiap iku rayat ngembuan runding ti bakanya, tu deka meri pengelemi ngagai parti kitai,” ku iya nambah.

Kelimpah ari nya, lebuh dirandau raban pemberita, Mat Sabu mega madah ba pengawa bepilih ti deka datai, kitai deka meda ubah baka ti nyadi ba pengawa bepilih besai (PRU) ke-14 ti udah.

“Pengudah penuduk menteri enggau menteri muda ba Perintah Besai bisi ari nengeri tu baka Baru Bian enggau Chong Chieng Jen, aku ngasaika rayat deka ngembuan runding ti bebida ngagai Parti Amanah.

“Enti sema perintah Pakatan Harapan (PH) ulih merintah nengeri tu, nya deka meri pengelebih ari sukut pemansang,” ku iya.

Dalam strategi ngubah runding rayat, Parti Amanah Menua deka seruran meri penerang tauka aum begulai enggau rayat.

Berebak enggau nya, Direktor BPR Nasional Datuk Wira Mohd Hatta Ramli madahka kelimpah ari polisi perintah PH ba renggat nasional, sida mega patut beratka rayat ba Sarawak ngambika rayat ulih nerima PH.

“Nya kebuah kami ba opis menteri kelebih agi ba opis menteri aku, mai orang Sarawak sama sereta dalam program dagang enggau bebendar.

“Program-program tu mega dipejalai enggaiu enda bechiping, lalu nengah nya runding rayat bekaul enggau parti mega deka diubah,” ku iya ti mega nyadi Sapit Menteri Pemansang Pengawa Dagang Malaysia.