KUCHING: Peragam negatif komuniti ngagai indu ke ngampang patut diubah lalu diputar enggau manah.
Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Seri Fatimah Abdullah madahka apai indai napi pemar nemu anak sida ngampang laban bala anak takut nusi ketegal nangika peragam negatif komuniti.
“Pekara udah nyadi enda ulih diseliahka, pekara ti patut digaga kitai iya nya merambu nama pekara ti patut digaga ungkup indai enggau anak ti deka diadaka iya.
“Taja pia, peragam negatif komuniti kitai enda muntang nerima orang ngampang laban menua kitai ukai baka menua Barat,” ku iya.
Fatimah bejaku munyi nya lebuh aum pemberita One Stop Teenage Pregnancy Committee (OSTPC) ditu, kemari.
Ku iya, OSTPC nagit mayuh agi komuniti sedar pasal nembiak ngampang sereta nemu tanggungpengawa sida dalam mantu raban tu.
“Kitai ukai semina fokus ngagai nembiak indu ti ngampang tang mega meri fokus ngagai nembiak lelaki sentang tanggungpengawa sida.
“Kitai patut mutarka penanggul tu begulai sereta ngiga chara mutarka kes nembiak ngampang ari nambah ukai ngembuan peragam negatif ngagai sida,” ku iya.
Fatimah nandu, dalam meri sukung ngagai nembiak ti ngampang perintah udah ngatur mayuh program sereta sistem sukung ti engkeman.
“Siti ari sukung perintah iya nya nyendiakan palan ngagai nembiak ngampang dikumbai Taman Sri Puteri.
“Tebal agi sida ti diau ba palan tu atas perintah kort baka kes dipasung.
“Ba palan nya sida diberi makai, palan diau, dijaga nyentukka anak iya diadaka baikka anak nya deka diibun apai indai tauka nyadi anak iru pengudah ada,” ku iya.
Iya mega madahka lebuh diau ba Taman Sri Puteri, nembiak ti ngampang nya diajar sekeda peneleba pemun baka bejait, kulinari enggau salun awakka ulih ngiga kereja pengudah keluar ari palan nya.
“Bagi nembiak ti agi deka nampung sekula, kitai meri kelas tuisyen ngagai sida.
“Naka diatu, semina tinggal lapan iku aja nembiak ti agi diau ba Taman Sri Puteri,” ku iya.
Iya mega madahka, entara sistem sukung bukai ti disediaka nyengkaum palan ngengkah anak ti baru ada ba Sepital KPJ (baby hatch) enggau sukung pengarap.
Sama bisi enggau aum nya Sekretari Mendam KWKPK Dr Rashidah Bolhassan.