“Nembiak rebak baru nyangka enda ngelala nama ti dikumbai serak buluh, akar engkudu, akar tarum enggau akar penawar landak,”

KUCHING: Dipelaba mayuh nembiak rebak baru enda nemu penatai asal ubung pua kumbu digaga ari akar utai tumbuh.

Ku Nancy Ngalie ari Kapit taja pua kumbu tu mar digaga iya andalka pengawa asal bansa Iban tu enda putus jemah.

“Diatu kami chakah nenun pua kumbu asal laban tu asal pengelandik jari kitai Iban.

“Nembiak rebak baru nyangka enda ngelala nama ti dikumbai serak buluh, akar engkudu, akar tarum enggau akar penawar landak,” ku iya.

Nancy sempat dirandau Suara Sarawak lebuh benung kiruh bejual pua kumbu maya Agrofest Sarawak di Stadium Nengeri Sarawak ditu, kilah ensana.

Ku iya, penulin chura pua kumbu bepanggai ba pengituk orang nyura ubung.

“Chura biru tu digaga ari akar tarum tauka renggat, chura mirah ari akar engkudu enggau chura kuning ari akar penawar landak.

“Nyema chura tu enda digaga meruan ba ubung putih pendiau pua kumbu deka enda manah.

“Nya alai kami nanam kediri dandang engkudu enggau tarum laban deka nyaga kualiti chura pua tu,” ku iya.

Tambah Nancy, kenyau iya beumur 15 taun iya sigi udah nemu nenun pua kumbu belajar ari indai iya empu.

“Nya kebuah besai amai pengarap aku ngambi pengawa asal kitai tu enda lela ngapa.

“Ba aku empu, taja rega pua kumbu tu enda berega jemah tang aku tetap deka ngaga ngambika bala serak redak aku nemu tu pua bansa kitai,” ku iya.

Batang pengawa Nancy ti diau ba Rumah Gare Sungai Kain Balleh, Kapit endang nenun pua kumbu laban ku iya ninting taun mayuh temuai menua luar deka meli pua kumbu iya.

Pua Kumbu Nancy dijual ari rega RM700 ngagai RM2,500 selambar.