Udah bisi vaksin, sektor ekonomi dikeandal dibuka penuh

KUALA LUMPUR: Penatai vaksin Covid-19 nya entara chara pemadu manah nyungkak baru pemansang ekonomi menua.

Felow Akademi Sains Malaysia Datuk Dr Madeline Berma madahka, pemisi vaksin nya mega nandaka perintah enda ibuh agi bejalaika Atur Mindah Betagang (PKP) lalu engka sektor ekonomi deka dibuka penuh.

“Lebuh perintah bejalaika PKP sebedau tu, kitai meda ekonomi balat kusut lebih 17 peratus, ekonomi menua enggau menua luar kusut laban nadai vaksin.

“Nya alai kitai semina ulih nyaga takah, nutup sekeda sektor ekonomi, pejalai disekat enggau ke bukai.

“Tang pemisi vaksin nya, enti ari sukut ekonomi kitai enda ibuh agi nyekat pejalai lalu nadai kebuah perintah bejalaika atur nya,” ku Madeline.

Madeline mansutka jaku nya lebuh nyadi temuai Program Ruang  Bicara ari Bernama TV dikumbai ‘Setahun Malaysia Prihatin (Ekonomi, Politik  dan Perundangan)’, malam kemari.

Ku Madeline, rayat mesti nitihka Atur Pengawa Standard (SOP) enggau nyaga diri ngambi nyaup nagang igi penyakit Covid-19 taja menua udah bisi vaksin.

Nangkan nya, bekaul pemanah perintah sekumbang setaun megai menua, Pemikir Politik enggau Pekara Undang-Undang Prof Datuk Dr Abdul Halim Sidek madahka, inisiatif dipejalai perintah ngelama tu mandangka penyiru perintah betatika penusah rayat kelebih agi maya pandemik Covid-19.

“Ba penemu aku, kitai enda ulih berundingka perintah diatu enggau perintah ke dulu laban dalam sejarah Malaysia, tu keterubah iya sebuah perintah napi penusah besai pasal isu Covid-19 kelimpah mesti megai menua enggau manah sereta betatika pengelantang rayat, ekonomi enggau pekara bukai.

“Peirntah mesti berati lalu begunaka sukung ari semua orang nadai ngira sekalika ari penyakal tauka perintah, opis perintah tauka peribit.

“Perintah ke diatu endang patut digelar perintah ti siruka rayat laban mayuh program enggau agenda dipejalaika perintah ungkup rayat,” ku iya nerang.

Ungkup penerang, Malaysia nerima bekal vaksin Covid-19 keterubah bansa Pfizer-BioNTech iya nya 312,390  dos kena 21 Februari tu tadi.–BERNAMA

Suara Sarawak