KUCHING: Udah datai maya iya Sarawak ngatur pengawa bepilih, ku Menteri Dagang Temuai, Seni enggau Main Asal Datuk Seri Nancy Shukri.

Nancy ke mega Kaban Parlimen Batang Sadong madah, Pengawa Bepilih Nengeri Ke-12 (PRN-12) Sarawak udah ulih diatur beduduk ari Dun udah abis timpuh.

“Ba penemu aku, diatu udah tau ngatur pengawa bepilih laban udah ngelebus haribulan madamka Dun ba bulan June tu tadi.

“Nya alai ba penemu aku, kitai udah lama ngelebus timpuh nya,” ku iya ba aum pemberita Maraton Jematan Batang Sadong, ensanus.
Tang ku iya, siti pekara ke mesti diadu manah nya ari sukut chara baru.

Nancy mega madahka iya pechaya, Opis Menteri Pengerai Malaysia (KKM) mega udah bisi Atur Pengawa Standard 9SOP) laban mesti sedia ungkup PRN Melaka.

“Kitai mesti sedia belama lalu rayat empu mesti nitihka atur ke udah ditetap,” ku Nancy.

Iya mega bisi nerima penerang pasal Komiti Pengawa Bepilih (SPR) udah nyendiaka diri baka SOP.

“Nya alai, nadai kebuah kitai deka nyeliah ari ngatur PRN tu,” ku iya madah baru.

Nambahka nya ku iya, semua orang gagit lalu nya kebuah sida di opis menteri sedia enggau aktiviti baka Maraton Jematan Batang Sadong tu.

“Enda lama agi Citrawarna. Kitai mesti ngempung mensia mayuh sama ngerami tu lalu kitai mesti masai enggau penyadi endemik tu,” terang iya.

Ku iya, kitai nyau nganti taun 2024 ngatur pengawa bepilih enti sema rayat enda masai enggau penyadi endemik tu.

“Sampai kemaya kitai nganti taun 2024 nya, nya kebuah rayat mesti masai enggau pekara ke nyadi diatu,” ku iya ngelansa.

Dulu ari nya, enti nitih Dun Sarawak udah dipadam kena 7 June tu tadi tang pengawa nya enda ulih dipejalai laban nitihka Ordinan Darurat (Kuasa-Kuasa Perlu) 2021.