Udah sedia nyingkang ngagai taun baru?

TINGGAL beberapa jam agi genap pukul 12 tengah malam tu legi dia kitai deka ninggalka taun lama lalu nyingkang ngagai taun baru 2020.

Kati kitai udah sedia nyingkang ngagai taun baru? Sekeda ari bala kitai tentu gagit deka ngepunka taun baru enggau juluk tauka pengarap ti baru.

Pia mega lebuh kitai berandau enggau bala pangan sehari dua tu tentu kitai jampat nanya sida. Nama juluk nuan taun baru wai punggal, kaban, bakih, jang, umang, igat, endu, ayak, ibu?

Tentu bisi bemacham saut. Iya ke bujang dara nyangka madah diri deka bebini, iya ke udah berumah tangga tentu ngandalka purih tauka nambahka peturun diri.

Sida ke bedau gawa tentu minta bulih kereja, lalu sida ke udah gawa tentu ngandalka diri niki gaji, kelimpah orang minta dagang majak ngerembai, lalu apai indai, aki ini kitai tentu sida iya besampika diri meruan gerai panjai umur nguan menua.

Kekadang sekeda juluk bala kaban munyika betundi ngasuh geli ati tang aku pechaya semua kitai tentu ngining pemujur ke lebih manah ari taun ke udah.

Arapka taun baru petara ninga sampi tauka juluk kitai lalu merekatka peminta nya, nyangka udah kelalu lama nganti nyadi taun baru ngarapka semua nya nyadi nyata.

Taja pia genap pekara ti deka dijapai, ukai semua datai enggau muntang. Semua nya beguna pengeransing tauka pengeliat ati kelimpah sukung ari mayuh piak.

Ngelansa pasal juluk taun baru mega, nyadi semua orang endang ngandalka diberi tuah ke belimpah ari petara.

Deka ngulihka jereki ti belimpah pan semua nya patut bepun ari pengeransing diri empu ngiga, nyidi, ngerawang, mansik, minta enggau ngambi ari endur ke patut sereta nengah jalai ti betul.

Nya alai, dikena nyapai pengingin ati diri kitai meseti nyikap pengering diri bepun ari diatu awakka asil iya ulih dijapai, diketau tumu sekalika nya ba pun taun, tengan taun tauka ujung taun.
Sebedau ninggalka taun 2019, arapka semua kenang pait ti kala ditapi kitai nya patut ditela enggau jaku ‘trauma’.

Enti bepelasarka kamus dia jaku trauma tu ngundan reti lansa pengidup ti chukup pedis.

Tang ba bidang perubat trauma mai reti telih, pemedis ba tubuh ketegal penusah eksiden.

Nya alai, arapka semua kita enda ibuh kelalu trauma ketegal pekara ke udah disepi laban beribu tauka bejuta mensia di dunya bela ngasai pekara ke sama.

Bisi enda kini, orang ba dunya tu langsung nadai kala telih ba tubuh sida?

Kenyau ari ada sampaika iya mati langsung enda kala telih ba tubuh. Tentu nadai orang ti baka nya, pelaba aku.

Indah pantang kemundang pan kitai berasai pedis, taja tubuh enda telih laban nya utai ti tau ngasuh kitai enda nyamai ati.

Reti nya, semua orang endang kala telih tauka ngasai pemedis. Semina bida iya, penusah ke ditapi bisi nya mit lalu bisi nya besai.

Kitai bela ngarap ba taun baru, anang enda berani nempuh sebarang pemar, tanggungpengawa baru enggau nguji ngubah pendiau diri ngagai tikas ke lebih manah.

Berebak enggau nya, dalam nyapai genap pemujur tauka pemansang tentu bisi pemar iya, anang mudah ngaku alah anggap semua nya semina penguji ari petara.

Taja pia, kitai naka ulih minta diri diseliahka ari sebarang penguji ti ngelui ari pengulih tauka pengering kitai anak mensia.

Penulis rindu meransang sereta besampika semua kitai awakka seruran lantang ati, ngembuan pengidup ti regas, ngibun ati ti beresi laban nya mih kunchi pengidup ti bepengerai. Aram mupuk nyingkang ngagai taun 2020!.