ARTIKEL

MEREDITH B

Udah selatan Meredith B nyadi penanyi

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

SEBUT aja nama Meredith B, nadai siku orang enda ngelala penanyi bajik beumur 25 taun nya laban nama iya udah lekat ba ati bala peminat lagu Dayak.

Lagu Ketegal Sida Tua Beserara mujur ngangkatka nama Meredith B pegari ba industri muzik Dayak seraris enggau nama bala artis bukai ti bepenau.

Sekumbang mekuh pengawa nya, penanyi ba baruh perabung Oliver Christy Henry (OCH) Sound Production nya mujur ngeluarka mayuh lagu diri.

Nya nyengkaum lagu Bujang Kepayang, Bujang Manchal, Sagam Lubuk Ati Nuan, Milih Sulu, Enda Nesal Milih Nuan, Nuan Keterubah enggau Teperasa.

Iya mega bela ngeluarka lagu Ketegal Sida Tua Beserara, Tisa Ati Ketegal Nuan, Puntan Pengerindu, Pengeran Ngasuh Belala enggau Mabuk Pengerindu.

Ukai naka nya aja, Meredith B bisi ngeluar lagu bepadu nyawa enggau penanyi Clinton Ijau nengah lagu Semaya Pengerindu Tua sereta Gulliver Thomas nengah lagu Sumpah Danji Tua.

Pemadu baru, iya ngeluarka lagu Bisi Sempadan Antara Tua ti mujur dikeluarka ba pelasar YouTube OCH Sound Production ba Bulan March 2022.

PENGERINDU DITAGANG
…ibun enggau manah iya ti dipilih sida, nyangka udah selatan tua diatur petara, enggau sabak sintak ati aku nerima, beterutu ai mata naya ingat belama…

Baka nya ku sekeda genteran lagu Bisi Sempadan Antara Tua ti disadaka anak tuai ari tiga iku diri menyadi nya.

Iya madah, lagu nya kebendar ngenang pengerindu dua iku sulu ti puntan ba tengah jalai laban bujang peruji ati iya disabung enggau indu bukai.

Tambah mega, ku Meredith B, seduai bela jauh pangan diri diserara Tasik China Selatan laban indu nya gawa ba Malaya lalu lelaki nya diau ba Sarawak.

“Nya meh kebuah seduai enda panjai begulai nyangka semua nya udah diatur petara lalu lagu tu nadai mangka pengidup aku,” terang iya.

Seraya ngelalau, ku iya, muai semua pengingat besulu nya endang pedis tang belajar meh nerima enggau ati lantang laban tentu bisi pekara manah ari semua ti nyadi nya.

UDAH SELATAN
Pengerindu Meredith B ba pengawa belagu nya endang dikembuan iya ari mit nyentuk suah diasuh orang merindang maya bisi pengerami.

Amat meh ngembuan pengerindu ti besai ba pengawa nya tang iya enda terundingka diri empu ulih nyadi siku penanyi dudi hari.

Lebuh bisi pekit belagu ba pelilih Simunjan enggau Kota Samarahan, Meredith B suah ngambi bagi nyengkaum Pekit Belagu Summer Vocal Challenge ti diatur The Summer Shopping Mall ba taun 2017.

Taja enda mujur bulih lumur ba pekit nya lalu pemanah sada nyawa enggau penau belagu dikembuan iya mujur narit ati siku akim ti mega pemungkal OCH Sound Production, Pengajar Oliver Christy Henry.

“Tak asai ti bula seraya agi enda pechaya lebuh Pengajar Oliver nanya aku nyadi siku penanyi ba baruh perabung sida.

“Iya muji sada nyawa aku lalu meri peluang ngagai aku ngerikod enggau ngeluarka lagu ba baruh perabung sida nyentuk aku mujur ngeluar album keterubah diri ti pejuluk Bujang Kepayang.

“Maya nya suba, aku baru abis Pom Lima. Aku pechaya semua ti nyadi tu endang udah diatur petara lalu nyangka tu udah selatan aku ba dunya pemerindang Dayak tu,” ku tusui Dara Simunjan nya.

TERUS PEGARI
Sekumbang nampung pelajar ngagai tikas ti tinggi agi, Meredith B nyau enda tentu chakah ngaul pengawa merindang laban deka ngemeratka pelajar diri.

Taja pia, pengudah tembu belajar ba taun 2023, iya madahka diri deka ransing agi merindang enggau ngeluar mayuh lagu bekualiti bemacham rentak.

Penanyi ti landik nebah kereban muzik nya berasai temegah meda pemansang enggau penyulut besai industri muzik Dayak kemaya hari tu setikas enggau industri muzik bukai.

Nya alai, ngena peluang tu, Meredith B beterima kasih ngagai semua peminat nyengkaum bala bakih, kaban belayan enggau sida sebilik ti enda leju nyukung sereta besampika pemujur iya.

Iya mega beterima kasih ngagai Pengajar Oliver ti udah meri peluang enggau ngelempai pengandal ngagai iya nyadi siku penanyi ba baruh perabung OCH Sound Production.

Ku iya, teruska sukung kita ngagai bala kami penanyi Dayak ngambi industri muzik kitai terus nyulut lalu ari sukung kita meh kami deka ransing agi merindang enggau ngeluar mayuh lagu.

LURUS ATI
Nangkan nya, sida ti deka nguji nyingkangka kaki ba dunya pemerindang, ku Meredith B, meseti nentu tuju sida beamat-amat deka merindang lalu ukai semina deka tebilang aja.

Kebuah pia, ku iya, ba dunya pemerindang, amat meh mayuh orang rindu meda kitai tang kitai patut nemu mayuh agi orang ti begedika kitai.

“Seruran ngemaruhka diri empu lalu anang jampat ngemana jaku rara tauka pejah bala peminat sereta enda mekit bala artis bukai tang nyadi meh diri empu.

“Pia mega, beri meh kerejasama penuh maya ngaga video muzik, ngerikod lagu ba studio tauka maya merindang.

“Anang meda pekara nya ngena sepiak mata aja laban amat meh nya semina pekara ti mit tang empas iya chukup besai,” ku lalau Meredith B.

MAJAK DIKELALA… Lagu Ketegal Sida Tua Beserara mujur ngangkat nama Meredith B sereta majak dikelala mensia mayuh.
UDAH SELATAN… Pemanah sada nyawa enggau penau Meredith B ba pengawa belagu mujur narit ati Pengajar Oliver.

BERITA LAIN

Penyulut SPM meri pengaga ngagai semua

KUCHING: Bulih pemutus peresa nyulut ba Sijil Pelajaran Malaysia (SPM) 2023 ukai penyulut siku orang aja tang nya penyulut semua raban. Nembiak Sekula Sekondari (SMK)

Saripah Tuah angkun ngangkat pesaka Bisaya

ANGKUN deka nyaga kereban asal raban bansa Bisaya, Saripah Tuah, 44 bejalaika dagang ngelakuka semua kereban tradisional Bisaya awakka enda punas disegang arus pemansang dunya

BERITA TERBARU

Penyulut SPM meri pengaga ngagai semua

KUCHING: Bulih pemutus peresa nyulut ba Sijil Pelajaran Malaysia (SPM) 2023 ukai penyulut siku orang aja tang nya penyulut semua raban. Nembiak Sekula Sekondari (SMK)