SEBAUH: Betatika nasip bala ke dituntung penusah karam di darat ba Pasar Tubau, dia Sapit Menteri ba Opis Menteri Besai (Pekara Sabah, Sarawak enggau Pengawa Khas), Datuk Wilson Ugak Kumbong berumban ngesah enggau nyuaka bantu ngagai sida.
Kaban Parlimen Hulu Rajang nya empu udah nyuaka pemeri sepenyampau RM20,000 lebuh ngabas endur penusah nyadi kena Hari Tiga.
Kelimpah ari nya, Opis Pengintu Pengelantang Komuniti (JKM) enggau Raban Nyaga Orang Periman Malaysia mega bisi nyuaka bantu tumu baka pemakai rangkai ngagai sida.
Pia mega KERESA Plantation Sdn Bhd enggau Serakup Jelalong Tubau Action Committee (JTAC) bela udah nyuaka pemeri mata duit sepenyampau RM2,000 enggau RM1, 000.
Raban JKM Bagi Menua Bintulu ngenukuka 108 iku diripot kena penusah nya tang nadai apa nama.
Nitih ke penerang, penusah nya nuntung empat unit begunan nyengkaum tiga unit kedai suwa enggau 28 unit bilik suwa.
Berebak enggau nya, Ugak minta sida ke kena penusah meri kerejasama ngagai ejensi ke datai nganjung bantu.
Sama datai Pegawai Pelilih Sebauh William Manggoi. sereta bala bukai.
