Ukir Bungai Kechala mai tuah ngagai Priscilla

BINTULU: Penyelai ukir Bungai Kechala mai tuah ngagai Priscilla Nyambong, 31 taun, pengudah champion ba Pekit Kain enggau Selampai Sulam diatur begulai CC Beauty enggau Tuan Sangin.

Peranak asal Katibas Song tang ngentapka diri ba Kapit diatu nya endang siku orang ti landik ba pengawa begagaka sulam ukai semina kain selampai aja tang mega baju burung.

Nambahka nya, chura dipilih Priscilla mega manding amat dipeda ti ngasuh ukir Bungai Kechala ba selampai nya nyau ngasuh ati bala akim enggau sida ke ngundi tekait.

Ba penuduk lumur dua, Lydia Bajok, 35 taun, ari Kapit mega ngembuan pengelandik nyulam bemacham bansa ukir pua kumbu ti nyelai sereta alus dipeda baka udah diangkatka iya lebuh bepekit sekali tu.

Indu dara bajik penakan Iban China ari Kanowit benama Stephanie Ho, 19 taun, menggi penuduk lumur tiga ti mantaika ukir enggau chura asal Dayak ba selampai disulam iya.

NARIT ATI… Priscilla Nyambong begaya ngena selampai sulam Buah Kechala.

Pemungkal CC Beauty, Cecelia Lagak madahka pekit dipelanja begulai Algasana Boutique enggau Anita Nyutha Enterprise udah dipasuk 180 iku pemekit tang semina 50 iku aja diambi masuk pekit nya.

“Naka diatu, kami raban pengatur chukup temegah ati lebuh nerima timbal chukup manah ari mensia mayuh lalu pemutus pekit mega nadai dibantah.

“Ari nya aku ngarika kami sebuat meri besai terima kasih ngagai semua pengundi enggau follower ti enda kala leju nyukung pengawa kami ngelama tu,” ku iya lebuh dirandau Suara Sarawak kemari.

Ku Cecelia, sepuluh iku pemekit bukai mega nerima perais sagu ati kelimpah ari Anugerah Pemadu Kreatif ti nerima Perais Selampai burie ari Mmak Ata.

Champion nerima perais mata duit RM400 enggau Baju CC Beauty, perengka pemajik ari berau CC enggau tikit wayang Belaban Hidup: Infeksi Zombi sereta trofi.

CHURA ASAL… Lydia Bajok ngangkatka chura asal enggau ukir bungai ba selampai sulam iya.

“Iya ke lumur dua enggau tiga mega nerima perais ke sama semina bebida ba penyampau ba mata duit aja, ke alai seduai nya nerima RM300 enggau RM200.

“Aku temegah ati laban tuju ngatur pekit tu mujur dijapai taja kitai napi penusah dibai pandemik Covid-19 diatu. Puji Tuhan semua pengawa lanchar,” ku iya.

Nya alai Cecelia besai amat pengandal mayuh agi bala bukai deka besaup ngangkat enggau mandangka bemacham kraf jari baka kain enggau selampai sulam nya.

“Aku ngarapka mayuh agi raban bansa Dayak kelebih agi rebak biak deka ngemansangka pengawa pengelandik jari baka tu dudi hari lalu ngatur pekit dikena meransang sida.

“Produk kraf jari tu ukai semina ulih nyadika pemandang ba bilik penaik kitai siku-siku tang mega tau endar dijual ngambi ulih nambahka belanja,” ku iya madah nyemetak.

Ngena peluang nya, iya meri tabi puji enggau basa ngagai bala akim kitai, Mmak Ata (Riong Gimang), Clement Kanyan Wong enggau Chris Janggu Galau ti udah nyaup ngemujurka pekit nya.

“Terima besai mega ke sukung bala mayuh ti sama ngerichahka agi pekit kitai serak tu, kita ke meri ‘like’ enggau jaku peransang ngagai bala kami.

“Beri awak ke kami belelak seminggu dulu sebedau kami ngatur Pekit Tango enggau Selampai Manik. Salam Sayau ari aku Cecelia Lagak,” ku iya nyimpul randau.

Ke penerang, kain enggau selampai sulam bala pemekit udah dipandang ba page Rasmi Cc Beauty HQ lalu diundi mensia mayuh nengah chara like ba gambar.

Batang tuju pekit meri awak peranak Sarawak mandangka pengelandik jari lalu meransang nembiak rebak baru ngambi neleba kediri enggau pengawa ti mansutka asil.

PERANSANG REBAK BARU… Stephanie Ho nyadi chunto rebak baru ti angkunka pengawa indu rumah panjai.

 

ALUS… Selampai sulam Stephanie Ho ngangkatka bungai terung enggau ukir asal Iban.

 

Cecelia Lagak 

Suara Sarawak