Ukum meseti berat ungkup deriba mabuk

KUCHING: Menteri Muda Perengka Pengangkut Datuk Dr Jerip Susil ngarapka atur diteritka Perintah Besai bekaul enggau penyalah deriba maya mabuk dipejalai nengah chara beratika semua pekara.

Ku iya, nyema perintah ngeletak ukum ke berat, iya ngarap nya ulih nagang enggau ngurangka penyampau orang ti rindu deriba maya mabuk.

“Tang taja pia pekara nya ukai semina mungkur undang-undang, pekara ke lebih beguna iya nya, mensia mayuh ba renggat baruh patut beratika atur nya enggau penuh.

“Ba aku undang-undang enda chukup, laban undang-undang tu nyangka enda ngasi ngagang siku-siku orang nya badu ngirup ai bisa, lalu enti nyema kelalu mayuh diirup tau bendar ngeruga pengerai sida dudi hari,” ku iya maya dirandau pemberita ditu, pagi tadi.

Ku iya, ukum berat nya patut dipejalai laban diatu penanggul rama majak nyadi, lalu nya ulih dipeda mayuh nembiak rebak baru terunda-rundang beirupka ai bisa tu.

“Tebal agi penusah bebadi ba jalai alun tu mungkur sida ke ngirup ai biasa lalu aku ngasai undang-undang tu ulih nagang sida ari ngirup ai bisa penapat kelimpah ngurangka penanggul rama ti nadai nguntung.

“Pangka ari pekara tu iya mega deka meri pangka ngagai produktiviti menua, laban sida ke dituntung penusah nyau tejanggal nurun gawa, ngenusah diri sebilik enggau ngerugika menua laban mungkur ungkup bejuta ringgit,” ku iya.

Jerip mega madah neritka atur undang-undang aja enda chukup laban pengawa nagang orang ngirup ai bisa patut dipansik lalu patut beratika mayuh pekara.

Suara Sarawak