Ulah peranak Sibu ngemujur Kimpin ‘Siku, RM1’ mantu sekula angus dipuji

SIBU: Penyiru sereta ulah peranak Sibu ti gerah jari dipuji Parti Sa’ati Rayat Sarawak (SUPP) berekat sukung ngagai kimpin bepupu mantu Sekula Sekondari Peribit China Citizen ti angus apin lama.

Kimpin ti udah diatur ba Pasar Sentral Sibu nya mujur bulih duit pupu penyampau RM5,100.99 taja diatur pengelama sejam setengah aja.

Sapit Presiden II SUPP Datuk Chieng Buong Toon madahka kimpin nya dilanchar berengkah ari pukul 7.30 nyentuk 9 pagi.

“Kimpin ‘Siku, RM1’ tu nerima timbal ke chukup manah laban peranak dia bela gerah jari nyuaka tulung sida.

“Kimpin tu semina dipejalai ba Pasar Sentral Sibu aja ke alai kami nagit pengusung datai nyuaka tulung sida.

“Tebal agi, pengusung dia ngembuan ati siru enggau keran mantu Sekula Sekondari Peribit China Citizen ti ditinggang penusah,” ku iya lebuh dirandau udah kimpin nya, ditu kemari.

Chieng madah, pupu bans aba Sibu ngembuan penyiru enggau nyuaka bantu sida taja nya sekula peribit China.

“Nadai ngira China, Iban, Melayu tauka bansa bukai endang nyuaka bantu sida ngambi nyaup ngelempung tating penusah ditapi sekula nya.

“Aku berasai chukup temegah ati meda pekara tu lalu tu meh penyelai dikembuan pupu bansa ti sanggup mantu raban ti tusah nadai ngira bansa,” terang Chieng.

Ku iya, pemeri ti diterima nya dikena mantu sekula ngentak baru buding ti angus kena 23 Oktober tu tadi.

Nangkanka nya, Chieng madahka duit tulung naka diatu penyampau RM138,700.98.

Sebedau tu, iya madahka SUPP mega mupu ari kaban iya sereta orang bukai baka pedagang enggau bala bukai ditu.

“Kami minta mensia mayuh seruran nyuaka tulung sida laban pengawa nirika buding baru nya dipelaba beungkus RM2 juta,” tandu iya.

Sama datai ngulu kimpin iya nya Sapit Chairman Majlis Daerah Luar Bandar Sibu (MDLBS) Kaunsilor Wong Ching Yong.

Suara Sarawak