Ulih minta pulai ari menua berengkah 25 April

KUCHING: Pemendar pulai ke rumah ari menua ulih dipinta berengkah ari 25 April tu.

Ba siti penerang Malaysian Government Call Centre (MyGCC), sida ke tepekul ba menua lalu deka mulaika diri ke rumah tau minta pemendar nya nengah aplikasyen GerakMalaysia.

“Sida ke nadai telefon binching tauka servis internet ulih nganjung peminta nya ba opis polis besemak.

“Sida meseti telefon dulu ngagai opis polis nya ngambika ulih ngaga semaya dulu ngambika enda besekut,” ku penerang nya tadi.

Kelimpah ari nya, sida ke udah besemaya meseti ngenataika diri ba opis polis ke semak nitihka haribulan ke udah ditetap lalu minta pemendar pulai ngagai rumah diri empu.

Taja pia, perintah deka beratika dulu genap peminta ke dianjung. Enti peminta nya udah dikemendar, sida ulih mulaika diri berengkah ari 1 Mei tu.

Suara Sarawak