Ulu Rajang deka terus dikemansang

KAPIT: Pemansang ba sitak Ulu Rajang deka terus dikemansang ambika rayat ditu sama ngasaika penyenang baka menua bukai lebih agi ba sukut pemansang insfrastruktur.

Kepala Menteri Sarawak, Datuk Patinggi Abang Johari Tun Openg madah ubah ba menua pesisir kelebih agi ba Batang Rajang udah mayuh berubah enti dibanding suba ari sukut pemansang insfrastruktur baka jalai alun.

Iya madah munyi nya rambau Pengerami Bejadika Gempung Parti Sarawak (Gps) Zon 11A N61 Pelagus, N62 Katibas, N63 Bukit Goram enggau N64 Baleh ba Rumah Robert Ngumbang, Nanga Sebatu, Batang Rajang kemari.

“Batang Rajang udah jauh berubah enti dibanding enggau suba laban suba semina dipeda pemayuh perau lebuh pengawa baka tu tang sehari tu kitai ulih meda pemayuh kerita,”

“Enti orang ngumbai menua ba Batang Rajang tu nadai ubah pemansang sida iya engka buta laban enda meda,”
“Semua pemansang tu berubah laban kitai sanggup ngubah runding diri,”ku iya

ADAT…Kepala Menteri Datuk Patinggi Abang Johari Tun Openg (duduk tengah) begulai enggau ketuai GPS ke bukai ngemujurka pengawa miring dikena mungkal pengawa.

Abang Jo mega madahka perintah nengeri Sarawak deka chakah agi meri pemansang ngagai Ulu Rajang nengah Agensi Pemansang Hulu Rajang (Urda) lalu ditimpuh dalam kandang dua taun sereta begunaka agih belanja sepenyampau RM1.5 bilion.

Urda sebengkah ehensi dibaruh RECODA ditumbuh kena 12 Julai 2017 betuaika Sapit Kepala Menteri Tan Sri Datuk Amar Dr James Jemut Masing lalu 41,186 km persegi nyengkaum dua bagi menua iya nya Kapit enggau Sibu sereta dibagi ngagai lima pelilih mit iya nya Kanowit, Song, Kapit, Bukit Mabong enggau Belaga.

“Ulu Rajang bisi penau mansang dudi hari, kitai bisi penatai pemisi ti mayuh ari asil betanam betupi nyengkaum barang pemakai,”

“Sarawak meseti mansang ba taun 2030 sereta ngasilka penemu ti baru nyikap diri ngubah atur pemansang ba nengeri tu,”

“Semina orang Sarawak aja nemu enggau patut beserakup ngetan sereta ngubah pemansang,”ku iya

Nambahka nya , nengeri Sarawak bisi pengelebih mansang ba ekonomi enggau insfrastruktur.

Taja pia pemansang tu enda ulih rumban sehari dua lalu ngambi awak ke patut endur iya ulih digaga.

“Ari pasar Kapit nuju ke jalai Baleh sereta ke Jalai Tunoh kitai ulih ngena agih belanja ari perintah nengeri empu,”

“Kitai ulih ngiga penatai pemisi nengeri nengah chukai minyak enggau gis sepenyampau 5 peratus ari menua sepiak (Semenanjung Malaysia) dikena ngemasangka menua tu,”ku iya.

Suara Sarawak