KUCHING: Perintah Sarawak deka ngubah undang-undang tanah nengeri rambau Aum Kunsil Nengeri (Dun) ti deka datai.
Premier Sarawak Datuk Patinggi Tan Sri Abang Johari Tun Openg madahka ubah nya deka negapka hak Sarawak ari mayuh sukut.
“Diatu aku bedau ulih madahka dalam agi, enti dipeda kasar kabinet udah besetuju ngambika pekara tu dibai ngagai Dun.
“Awakka kitai meda rambau Dun ila,” ku iya.
Abang Johari bejaku munyi nya lebuh ditanya rambau Pengerami Ngelalu Pengabang Hari Raya Aidilfitri Premier Sarawak di sebuah hotel tebilang ditu, kena 3 May tu tadi.
Aum Kedua Renggat Keterubah Dun Sarawak ke-19 ditagaka diatur kena 17 nyentuk 16 Mei tu ila.
Berebak enggau nya, Abang Johari madahka pengawa ekonomi di nengeri tu dijangka deka jampat ngerembai enggau suman.
Ku iya, rayat Sarawak udah ngayanka pengaga ati sida ngagai pengawa ti dipejalaika Perintah Sarawak dalam timpuh penyuman tu.
“Aku pechaya ekonomi deka jampat ngerembai enggau bejalai lanchar.
“Kitai bisi sekeda projek ti tejanggal ketegal Covid-19 lalu aku pechaya penyuman deka nyadi jampat udah tu,” ku iya.
Ngelansa Pengerami Ngelalau Pengabang Hari Raya Aidilfitri Premier Sarawak kemari iya madahka diri gaga meda rayat pupu bansa bisi datai.
Iya mega temegah enggau timbal mensia mayuh ti nyadi kelai manah mensia udah nerima penyuman pengidup baka selama.
Taja pia, iya ngelalau mensia mayuh ngambika nyaga pengerai enggau pengelikun diri.
Sama bisi datai ngusung ngusung pegerami tu iya nya, Tuai Pemegai Menua Tun Pehin Sri Abdul Taib Mahmud enggau bini, Toh Puan Ragad Kurdi Taib, Menteri Dagang Dalam Menua enggau Pekara Penguna Datuk Seri Alexander Nanta Linggi, Menteri ba Opis Menteri Besai (Parlimen enggau Undang-undang) Datuk Seri Wan Junaidi Tuanku Jaafar, Sapit Premier Sarawak Datuk Amar Douglas Uggah Embas enggau Datuk Sri Dr Sim Kui Hian, Sekretari Perintah Sarawak Datuk Amar Jaul Samion, bala menteri, raban tuai parti komponen Gempung Parti Sarawak (GPS), Presiden Parti Tindakan Demokratik (DAP) Sarawak Chong Chieng Jen, Adun Pending Violet Yong, Kaban Parlimen Bandar Kuching Kelvin Yii Lee Wuen enggau bala bukai.
