KUCHING: Menteri Dagang Temuai, Seni enggau Main Asal Datuk Seri Nancy Shukri meri sukung ngagai pemutus Kort Tinggi Kuching ti ngemendar sida beumur ari 21 ngagai 18 taun udah tau nurun ngundi.
Ku iya, maya Dewan Rakyat ngemendarka ubah Pekara 119(1) Sempekat Malaysia, sida udah bela setuju deka nurunka tikas umur ngundi.
“Pekara tu nyadi laban, rebak baru patut diberi peluang ngadu polisi Malaysia ti manah agi.
“Aku ngarapka Perintah Malaysia enda ngaga apil ngagai bekaul enggau pemutus tu,”ku iya nengah Facebook, kemari.
Berebak enggau nya mega, iya ti mega Kaban Parlimen Batang Sadong meransang rebak baru tau ransing agi bejalaika pengawa komuniti.
“Kelala tuai komuniti enggau betatika pekara ti bisi nyadi.
“Kita tau mantu komuniti lalu bejalaika tanggungpengawa nyadi ketuai ti biak ba pengawa pemasang menua,” ku iya.
Suba, Kort Tinggi Kuching udah madahka Komiti Besai Pengawa Bepilih (SPR) enggau perintah deka bejalaika Undi 18 bepun 31 Disember 2021.
Tuai Akim Alexander Siew How Wai udah ngeluarka pemutus nya sepengudah pemendar lima iku akim biak ti udah ngelalau perintah bejalaika ubah Sempekat Malaysia engkeman nurunka tikas umur mensia mayuh ti tau ngundi bepun ari 21 ngagai 18 taun.
