Undi 18 : SPR mesti nerang nyemetak

KUCHING: Komiti Pengawa Bepilih Besai (SPR) mesti nerang ngagai mensia mayuh pasal pemutus nangguhka atur pengulih pengundi beumur 18 taun (Undi 18) sereta pengawa rejister otomatik ngagai 1 September taun baru.

Sekretari Gerempung Patriot Sarawak (SPA) David Xavier Hii Chin Loung madah, raban sida asa enggau enggau pemutus nya sereta enda ulih nerima kedalih betegalka Atur Mindah Betagang (PKP) di selampur menua.

“Kami deka nangkan SPR iya nya Kaban Parlimen enggau Aum Parlimen udah ngemendarka ubah konstitusyen kena Julai 2019 awakka rayat Malaysia beumur 18 taun ke atas ulih rejister nyadi pengundi sereta nyadi chalun ba pengawa bepilih besai.

“Udah semak dua taun nya dikemendar, SPR ngembuan mayuh awak ngatur ubah nya, tang taun tu lalu bisi penerang madahka sida dipelaba tembu ngatur nya kena Julai 2021,” ku iya nengah sebengkah penerang kemari.

Kenu ku iya, SPR berutang penerang ngagai mensia mayuh lebih agi sida ke beumur 18 ngagai 20 taun laban nyan udah ngerampas hak sida ngundi ba pengawa bepilih besai ke diatur enda lama agi.

“Genap orang bisi hak ngundi lalu nya udah dirintai dalam pekat nyadi sebuah menua demokratik.

“Nya alai, SPR ti nyadi kaunsil eksekutif patut ngelengkaska atur lalu anang agi betangguh,” ku iya nyemetak.

Iya mega ngarapka pemutus nya enda ngaul sebarang kuasa politik laban nya udah diputuska parlimen, nya alai tanggung pengawa SPR semina ngatur enggau bejalaika pengawa aja.

“Hak ngundi endang hak sesiku mensia lalu sida bisi hak ngambi bagi dalam atur demokrasi milih perintah maya udah datai maya iya,” ku tandu iya.

Suara Sarawak