KOTA SAMARAHAN: Urung 1,000 paung kayu ari mayuh macham bansa tauka buah ditanam ba tanah pemesai 10 hektar di Universiti Malaysia Sarawak (Unimas), kemari.

Mandal Chanselor Unimas, Prof Datuk Dr Mohamad Kadim Suaidi madah nya siti ari chara numbuhka kampung nyadi model ungkup pengawa belajar, pansik enggau latih ngagai nembiak rebak baru.

“Kebuah program tu dipejalai ngambika nembiak rebak baru kelebih agi nembiak Unimas ulih ngelakuka pengawa nyaga sereta ngintu kampung di Sarawak.

“Nengah rambai jaku Kampung Pelajar Takasago-UNIMAS: ngenegapka pemesai guna kampung nengah pelajar, tu dikearapka ulih nyapai tagit nanam enda kurang ari 20,000 pun kayu ari mayuh macham bansa manggai taun 2023,” ku iya.

Teks jaku nya dibacha Sapit Mandal Chansellor (Akademik enggau Inovasyen) Prof Dr Wan Hashim Wan Ibrahim ba luar Dataran Chanselori Unimas beserimbai enggau program Takasago-Unimas Educational Forest:Tree Planting ditu, kemari.

Nangkan nya ku iya, kelimpah ari objektif bejalaika program nanam pun kayu ninting taun, projek nya ulih mantu nambahka peneleba belajar enggau ngajar ba luar ke guna pengawa pelajar dalam nembiak Unimas.

“Nengah program pelajar rampa menua ti baka tu, kitai ulih nambahka agi pengawa sedar nembaik ngagai guna nyaga rampa menua kitai.

“Nya alai, aku ngarapka inisiatif enggau komitmen ti seruran bejalai bakatu ulih nyadi perkara ti beguna ngagai pengawa ngelakuka pengawa sedar ngagai guna nyaga ekosistem kampung di Sarawak,” ku iya.

Kelimpah ari nya, Kadim mega ngarap ngambika program baka tu ulih ngerapatka kaul entara Malaysia, Jipun enggau menua bukai di selampur dunya.

Program ninting taun tu siti inisiatif kerejasama entara Unimas enggau Takasagi Thermal Engineering Co.,Ltd sereta Gerempung Jepun-Malaysia.

Naka tu, urung dua hektar tanah udah ditanam enggau lebih ari 3,000 paung ari mayuh macham pun kayu di Unimas.

Dalam timpuh lima taun ti deka datai, urung 20,000 pun kayu ari mayuh macham bansa deka ditanam ba kampus nengah projek nya.

Bela bisi nyereta program nanam paung pun kayu nya nembiak sereta pengajar ari Sekula Primari (SK) Ibnu Khaldun enggau komuniti menua Kota Samarahan.

Suara Sarawak