KOTA SAMARAHAN: Universiti Malaysia Sarawak (Unimas) ngempu tanggungpengawa ti beguna dalam mantu Perintah Sarawak kelebih agi dalam ngasilka penau nengah bidang betanam betupi moden.
Premier Sarawak Datuk Patinggi Tan Sri Abang Johari Tun Openg madahka pekara nya bekau ari krisis kurang bekal pemakai mata ti nyadi ba Malaysia apin lama.
“Sarawak ngembuan tanah ti besai, sepatut iya kitai mengeksport pemakai ukai nyadi pengimport pemakai baka ti nyadi diatu.
“Taja pia, Perintah Sarawak enda ulih nyapai pekara ti dilangkar nya kediri, perintah begunaka kita semua dalam nyalin komitmen tu dalam pengidup ninting hari sereta negapka penau dalam bidang kita empu,” ku iya.
Abang Johari bejaku munyi nya rambau Pengerami Kovokesyen Komemoratif Unimas di Dewan Tunku Abdul Rahman Putra (DeTAR Putra) ditu kemari.
Iya ti mega Pro Canselor Unimas madahka perintah ulih netapka polisi, tang pengereja pengawa ti ulih nyapai pengawa nya mesti datai ari semua piak nyengkaum raban orang dagang enggau servis.
Berebak enggau nya, Naib Canselor Unimas Profesor Datuk Dr Mohamad Kadim Suaidi madahka Unimas besedia mantu Perintah Sarawak dalam pengawa numbuhka Palan Agrotek nyadi sebagi ari pengawa ngasilka pemakai di menua tu.
Ku iya, palan nya mega deka ngepunka pengawa betanam betupi moden nyadi agenda besai nambahka pengeluar pemakai menua.
“Apin lama dalam program bejadika Ejensi Pemansang Bersepadu Wilayah Samarahan (Irsda), Premier Sarawak Datuk Patinggi Tan Sri Abang Johari Tun Openg bisi minta Unimas sama begempung mantu numbuhka Palan Agrotek di Samarahan.
“Nya alai, Unimas besedia mantu pengawa tu nyengkaum pengawa pansik awakka ulih meda peluang pemansang dalam sektor ekonomi betanam betupi moden enggau pengelikun pemakai ti deka dibantaika ngagai Perintah Sarawak enda lama agi.
“Unimas ngembuan peneleba dalam bidang agrotek enggau betanam betupi moden lalu kami meda pemansang teknologi dalam pekara tu amat beguna ungkup menua,” ku iya.
Kadim meda madahka penumbuh Palan Agrotek seriris enggau program ti deka dibuka ngagai nembiak Ijazah Agrotek ti deka berengkah ngambi nembiak baru bulan Oktober tu ila.
