UNIMAS seikas enggau universiti bukai

Tu dipandangkan nengah penyulut ke udah dijapai 237 staf UNIMAS ba MAGU 2019

“Sida ke diberi anugerah tu entara sida ti nunjuk rikod ke nyulut ba taun 2018 dalam bidang akademik, pengatur pengawa tauka servis.”

KOTA SAMARAHAN: Urung 237 iku staf Universiti Malaysia Sarawak (UNIMAS) mujur nerima 22 bengkah kategori anugerah ba Majlis Anugerah Gemilang UNIMAS (MAGU) 2019, kemari.

Mandal Chanselor UNIMAS Profesor Datuk Dr Mohamad Kadim Suhaidi madah tuju program tu dikena meri kelai basa ngagai sida ke udah nerima Anugerah Penyulut ba taun 2018.

“Sida ke diberi anugerah tu entara sida ti nunjuk rikod ke nyulut ba taun 2018 dalam bidang akademik, pengatur pengawa tauka servis.

PENGGI NUAN… Profesor Datuk Dr Mohamad Kadim Suhaidi nyuaka tepa ngagai Datuk Dr Mohd. Gazali Abas beserimbai enggau program MAGU 2019 ke diatur ba DeTAR Putra UNIMAS, kemari.

“Program tu siti program ti besai lebih agi ngagai sida ti pinchin tauka deka pincin ari UNIMAS lalu udah meri mayuh sukung enggau tulung ngagai UNIMAS,” ku Kadim.

Iya madah munyi nya lebuh bejaku beserimbai enggau program MAGU ba DeTAR Putra UNIMAS, kemari.

Ba taun 2018, mayuh pemujur ke udah diulih bala staf enggau nembiak UNIMAS sereta tu udah mandangka nama UNIMAS seikas enggau universiti ke bukai ba menua tu.

“Pemujur ke udah ditapatka UNIMAS tu mandangka UNIMAS chukup komited dalam ngemansangka sektor pelajar tinggi ba Malaysia lebih agi ba Sarawak.

“Taja pia, tu ukai pengujung dalam nyukat pemujur sesebengkah palan pelajar laban pemujur siti utai ti begunaka pejalai ti panjai sereta terus lalu tu patut nyadika teladan kitai nambaka pemadas pengawa agi ari taun ke udah,” ku iya.
Berambaika jaku ‘Teguh Bersama’, MAGU taun tu beratika 162 iku staf nerima Anugerah Servis Nyulut (APC) 2018, 25 iku staf nerima Anugerah Servis Angkun (APS), 19 iku staf nerima setipikit pinchin, lalu anugerah bukai nyengkaum anugerah akademik, anugerah pengawa enggau Anugerah Penyulut Lumba.

Sama bisi datai Ketuai Sekretari Opis Menteri Pelajar Malaysia Datuk Dr Mohd. Gazali Abas, Chairman Kaunsil Direktor Universiti, Tan Sri Datuk Seri Panglima Sulong Matjerai enggau ke bukai.