Unimas, SMA nyaup ngemujur ‘Open Lab’

KUCHING: Perintah Sarawak deka numbuhka makmal tebuka (open lab) ungkup nembiak sekula ba semua bagi menua di Sarawak.

Kepala Menteri Datuk Patinggi Abang Johari Tun Openg madahka Sarawak bisi 12 buah bagi menua ke alai perintah deka ngadu kerejasama enggau Unimas sereta Kaunsil Multimedia Sarawak (SMA) numbuhka palan belajar tu.

“Kitai udah bisi ‘open lab’ di Kuching, Lawas enggau Saratok lalu udah tu kitai andalka semua 12 bagi menua di Sarawak deka bisi ‘open lab’ sebedau numbuhka ungkup renggat nengeri (Open Lab Sarawak).

“Kitai tau bepun madah ngagai bala anak pasal pemesai guna pelajar Sains, Teknologi, Injinir enggau Matematik (Stem) nengah ‘open lab’ kelimpah madah ngagai mensia mayuh dalam napi transformasyen ekonomi nuju jeman digital,” ku iya.

Abang Johari bejaku munyi nya ba aum pemberita pengudah bejadi Pengerami Karnival Stem Satok ba Sekula Primari Rakyat ditu, tadi.

AUM PEMBERITA…Datuk Patinggi Abang Johari Tun Openg (dua kiba) mantaika penerang ba aum pemberita pengudah bejadi Pengerami Karnival Stem Satok ba Sekula Primari Rakyat ditu, tadi.

Ku iya, sambut bala nembiak ngagai pelajar Stem enggau ‘open lab’ tu amat manah laban sida diberi penemu pasal teknologi ti ukai dipejal.

“Baka ti digaga nembiak di sekula tu (SK Rakyat), sida nemu ngaga kuasa solar enggau angin nengah sebengkah perengka iya nya ‘lego’.

“Sida udah nemu reti ngulihka kuasa ari angin enggau panchar mata panas ti muntang lalu anak kitai jampat mereti pekara tu,” ku iya.
Tandu iya, mensia mayuh mega patut ngena peluang ba ubah teknologi dalam pengidup sida.

“Ba kampung mayuh kitai berumah kediri ke alai bisi tanah endur kitai nanam sayur ngena chara fertigasyen.

“Kelimpah nyimatka ungkus meli sayur pekara tu mega ulih nambahka penatai pemisi ruang bilik nyema sayur nya ulih dijual,” ku iya.

Suara Sarawak