Untung bejual nanas

MIRI: Asil ari makit pengawa bejual buah nanas ulih ngenataika mayuh untung ngagai raban penjual buah nya.

Siku penjual buah nanas, Sara Anye madahka tu keterubah iya nyerema program Nyual Buah Ari Kebun (JTDL).

“Aku nemu pengerami tu ari Kaunsil Makit Betanam Betupi Perintah Besai (Fama),” ku iya.

Ku Sara lebuh dirandau pemberita Suara Sarawak, iya udah ngaul diri dalam pengawa nanam nanas tu lebih 20 taun.

“Keterubah aku nanam nanas tu suba, aku semina ngambi paung nanas ari kaban belayan ke bisi nanam nanas.

MANIS… Sara nunjukka tugung buah nanas ti bisi dijual ba pengerami JTDL & Industri Asas Tani di Bintang Megamall Miri.-Gambar Ghazali Bujang

“Udah nya, aku ngerembaika pengawa nanam nanas tu lalu bulih bantu ari Kaunsil Nanas,” ku iya.

Sara madahka bantu ari piak ke bekaul baka Kaunsil Nanas, Fama enggau ke bukai mayuh mantu iya dalam dagang nanas.

“Diatu aku nanam nanas ba sebuah tanah pemesai 12 ikar.

“Lalu kira kasar dalam setaun aku ulih manggai lima ‘angka’ asil ari bejual nanas,” ku iya madah ngagai pemberita ba hari keterubah pengerami JTDL.

Kelimpah ari orang menua tu, orang ari menua Brunei Darulsalam mega entara orang ti meli buah nanas ari Sara.

“Dalam seminggu, bisi 200 ngagai 300 buah nanas mujur dijual aku ngagai sida tu,” ku iya.

Seraya ku Sara, ba pengerami JTDL tu iya semina nyual buah nanas aja lalu nadai mansutka produk bukai ari nanas.

“Kebuah pia laban aku nadai ulih limpang sereta magi masa aku ngaga produk ti dipansutka ari nanas.

“Juluk ati aku endang bisi laban aku udah kala belajarka chara ngaga produk ari nanas baka jem nanas,” ku iya.

Mensia mayuh ti rinduka buah ari menua tu tau sampal datai ngagai pengerami Bejual ari Ladang (JTDL) lalu bulih rega jauh murah ari rega makit biasa.