URDA: Perintah Nengeri deka ngamatka peminta rayat

KAPIT: Kepala Menteri, Datuk Patinggi Abang Johari Tun Openg meri jamin Perintah Nengeri deka bebendar ngamatka peminta rayat ba menua pesisir lebih agi sida ke diau ba Ulu Rajang, nengah ejensi ke baru ditumbuh, Kaunsil Pemansang Ulu Rajang (URDA).

Kenu ku iya, kenyau udah ditumbuh taun nyin kemari, URDA udah nerima 14 peminta peminta ungkup projek pemansang ke mungkur jalai raya, bekal ai enggau karan.

“Enti kitai deka meda semya tu, nya begunaka agih belanja ke besai. Nya alai kitai nyendiaka dulu agih RM1.5 bilion ungkup timpuh dua taun.

“Nyema bisi agih belanja tambah, kitai deka nyambung ngambika dipejalaika projek sepanjai maya, nyengkaum ngaga jematan Bailey besambungka Long Busang enggau sitak bukai,” ku iya.

Abang Johari madah munyoi nya maya bejadika Program ‘Merapatkan Jurang Digital Masyarakat Pedalaman’, diatur Kaunsil Multimedia Sarawak (SMA) di Long Busang kemari.

NGEMANSANGKA LONG BUSANG…Kepala Menteri Datuk Patinggi Abang Johari Tun Openg (empat kiba) begulai enggau Sapit Kepala Menteri Tan Sri Dr James Jemut Masing (empat kanan) sereta bala bukai nunjukka tanda puji bekaul atur pemansang ungkup menua Long Busang.

Long Busang diuan urung 1000 iku peranak ke mungkur menua Belaga, ulih dilawa nengah jalai sungai enggau jalai batang pengelama 12 jam, ari Bintulu enggau Bakun.

Kenu ku Abang Johari mega, ngelansa pasal peminta jalai raya ari peranak menua nya, iya deka berandau enggau Sapit Kepala Menteri (Tan Sri Dr James Jemut Masing) sereta Residen Kapit (Joseph Belayong Punan) pasal ngemeratka sitak ti patut dikemansang dulu, lebih agi ke mungkur jalain penyambung entara genturung pendiau.

Udah nya, ngelansa pasal ngedut takah digital ba sitak nya, Abang Johari madah, iya deka diuji, lalu SMA deka ngengkahka tiang komunikasyen dikena mai Long Busang ngagai dunya luar.

“ Long Busang mayuh bukit enggau gunung, nya alai arus penyambung tusah deka diterima. Nya alai kitai ngena chara baru.

“Kitai nguna satelit lalu nyema tu mujur sereta nadai penanggul, kitai deka neruska iya. Tang nyema bisi penanggul, kitai deka nguji mutar penanggul nya…reti nya semua endur di Sarawak deka ulih disambung kitai enggau arus telefon,” ku iya.

Tandu iya, ari sukut internet, Sarawak kebendar lebih maju enggau laju ari Semenanjung.

Diatu, peranak Long Busang data narit internet ngena parabola satellite, dental 30mps pengelaju.

Berebak enggau nya, siti agi tiang komunikasyen deka digaga iya nya besambunbgka menua Belaga enggau Kapit.

Suara Sarawak