Urung 40 iku nganjung diri swab test ba Klinik Ng Budu

SARATOK: Urung 40 iku udah nganjung diri beperesa pengerai tauka ngambi chunto lendir liur (swab test) ba Klinik Pengerai Nanga Budu kenyau ari pukul 8.30 pagi tu tadi.

Nitihka penerang, sida meri kerejasama penuh lalu datai baka taga jam ke udah ditesau Opis Pengerai Pelilih Saratok lemai kemari.

Sida ke datai nya bela madahka diri kala ngusung kedai renchit ba mua Klinik Pengerai Nanga Budu kena 13 nyentuk 21 Februari nyin tadi.

Nambahka nya, sida mega ngasika Atur Standard Pengawa (SOP) udah ditetap baka nangkupka sengkabung mua enggau nyaga takah enggau pangan diri lebuh nganti gintir beperesa.

Berindik ari nya, Sapit Menteri Pengeluar Kuasa enggau Pengeraja Asal, Datuk Ali Biju meri tabi puji enggau terima kasih besai ngagai kerejasama bala ke datai ngulu pengawa nya.

“Aku besampika semua kitai bulih pemutus peresa ke manah sereta kuru ari sebarang penusah.

“Kerejasama kita beguna amat nentuka menua kitai semampai likun ngambi Pelilih Saratok ulih mali ngagai zon gadung baru,” ku iya lebuh dirandau Suara Sarawak tadi.

Suara Sarawak