Vaksin ari China diaku dunya

KUCHING: Sarawak enggau China mesti nempa mayuh agi kerejasama pasal Covid-19 nentuka pandemik Covid-19 punas jampat ba menua tu, pia ku Konsul Jeneral Republik Rakyat China di Kuching Cheng Guangzhong.

Ku iya, China udah bejalaika inisiatif ngasilka vaksin Covid-19 sereta entara menua ti nyadi pemansut vaksin ba dunya.

“Kami keran nempa kaul kerejasama vaksin entarabansa sereta udah bejalaika beribu pansik enggau pemansang vaksin Covid-19 nyengkaum kerejasama ngasilka vaksin enggau menua bukai ba serata dunya.

“Nya kebuah, inisiatif tu mujur matak lebih ari 100,000 volunteer ari 100 menua lalu naka diatu, 17 vaksin Covid-19 China masuk ba renggat klinikal.

“Pia mega, lebih 60 menua nyengkaum Malaysia udah ngemendarka pengawa ngena vaksin ari menua China laban ngasi enggau pengelikun iya diaku serata dunya,” terang Cheng.

Cheng mansutka jaku nya rambau randau khas enggau Suara Sarawak, ditu ensanus.

Iya nyemetak madahka vaksin nya senyata besai dikena nagang pengerekai Covid-19 tu lalu meri peluang nyelamatka nyawa mensia ba serata dunya.

“Naka diatu, China udah nganjung bepuluh raban perubat, eskport 250 bilion sengkabung mua enggau 2.5 bilion kereban nyaga diri (PPE) kelai nyaup komuniti ba serata dunya nagang pandemik tu.

“Nya alai, kami seruran sedia berandau enggau menua bukai pasal kerejasama sereta atur ngambi ngaku pengawa betuchuk vaksin tu,” ku Cheng nerang.

Nambahka nya ku iya, kitai mega nempa kaul kerejasama ke manah sekumbang nagang pengerekai Covid-19 ari taun nyin kemari iya nya entara Malaysia enggau China nyengkaum ba Sarawak.

“Sarawak udah mayuh nyaup China maya terubah iya igi penyakit tu ngerekai ba menua China.

“Nya kebuah, kami naka ulih nyendiaka kereban berubat diguna sereta ngemeratka peminta ari menua tu.

“Ungkup rikod, Konsulat Republik Rakyat China di Kuching udah nyaup Perintah Sarawak meli 106 tan kereban berubat baka sengkabung mua enggau PPE ari China.

“Kelimpah bekunsika peneleba kami nagang pandemik tu, kami mega mai pakar perubat China ngagai menua tu nyengkaum ba Sarawak sereta nyukung kerejasama entara komuniti entarabansa ti bebendar nagang igi penyakit tu,” terang iya baru.

Ku Cheng ti udah gawa pengelama tiga taun ba Kuching, China enggau Malaysia deka terus nempa kaul kerejasama ungkup pemaik begulai.

Suara Sarawak