Vaksin dalam pemakai agi diuji

KUCHING: Perintah Sarawak nerima manah perambu Opis Servis Veterinar ngena umpan vaksin dalam pemakai ba pengawa nagang pengerekai igi penyakit rabies ba nengeri tu.

Sapit Kepala Menteri Datuk Amar Douglas Uggah Embas madah, naka diatu Opis Veterinar bedau madahka maya ti engkeman bejalaika pengawa ngena vaksin dalam pemakai nya laban agi dalam timpuh nguji.

“Enti pekara tu mujur ila, engka kitai deka mansutka dalam penyampau ti mayuh.

“Aku ngasaika chara tu ulih mantu kitai nagang pengerekai penyakit rabies ba nengeri ru,” ku iya.

Nangkan nya ku iya, sida agi nganti Opis Veterinar meri bekal umpan vaksin pemakai nya ngagai sida.

“Pengudah sida meri bekal nya ngagai kami, baru kitai ulih meda baka ni gaya pemujur ari pekara nya,” ku iya.

Ba lansa ke sama, Uggah madahka penyampau kes rabies ba nengeri tu majak kurang lalu mandangka bekau positif.

Uggah madah munyi nya lebuh dirandau pemberita pengudah pengawa nyain Sempekat Bekal Eksklusif Ikan Tilapia entara Borneo Eco Fish Sdn Bhd enggau Sugarbun di Wisma Sugarbun ditu kemari.

Suara Sarawak