Vaksin nya ‘sakang‘ Covid-19

SARATOK: Program betuchuk vaksin tu beguna amat dikena nempa komuniti kebal ari igi penyakit Covid-19.

Sapit Menteri Pengeluar Kuasa enggau Pengeraja Asal, Datuk Ali Biju madah, program tu mega dikena nagang igi penyakit Covid-19 ari majak ngerekai.

Ku iya, nya kebuah semua kitai mesti nyukung program tu nentuka juluk enggau tuju perintah nagang pengerekai Covid-19 mujur lalu ulih dijapai.

“Aku empu udah betuchuk vaksin lalu aku nadai ngasaika utai ke nyelai tauka menawa naka diatu.

“Anang nganti diri empu bulih penyakit laban utai tu endang bisi. Enti kitai enda enggau orang betuchuk vaksin, orang bukai udah lalu sida ulih mindah enggau nadai penanggul sereta penangi.

“Kati kitai deka begulai enggau orang, sida ke udah betuchuk vaksin nya endang andalka diri bisi ‘dinding bulu’ dikena ngelaban Covid-19.

“Nyadi kitai ke apin betuchuk tu takut belama, takut belama begulai enggau orang, takut mindah ke bukai laban nangika diri dirampit. Nyamai agi kitai betuchuk vaksin tu ari kitai ke takut.

“Padah ngagai orang rumah panjai, tu sakang tu, sakang Covid-19. Mayuh orang madah, tu orang nuchuk penyakit Covid-19. Ukai. Tu sakang Covid-19, tubuh kitai deka kebal ngelaban penyakit,” ku iya madah nyemetak.

Ali ke mega Kaban Parlimen Saratok mansutka jaku nya lebuh bejadika program Penerang Pekara Kemaya Hari diatur Opis Pemadah (JaPen) Malaysia Sarawak ba Rumah Dayak, ditu, pagi tadi.

Suara Sarawak