Vaksin Sinovac tambah udah datai pagi tadi

KUCHING: Bekal tambah vaksin Sinovac ungkup Program Betuchuk Vaksin Covid-19 Nasional udah datai ba Kuching tadi.

Menteri Kaunsil Kandang Menua enggau Pengawa Berumah, Datuk Seri Sim Kui Hian madah, sepenyampau 384,000 dos udah datai dikena ngemujurka Pengawa Betuchuk Vaksin Covid-19 Nasional pengelama seminggu.

“Nya sebagi ari inisiatif Perintah Besai nyendiaka vaksin ungkup rayat Sarawak ba bulan June enggau Julai tu,” ku iya nerang.

Nambahka nya ku Kui Hian, Sarawak bisi palan nyimpan nyentuk sejuta dos vaksin Sinovac enggau ulih nuchuk nyentuk 50,000 dos sehari.

“Bemacham inisiatif dipejalai begulai entara sepital peribit, klinik pengerai enggau palan betuchuk vaksin ngambi besaup nagang pandemik Covid-19 tu.

“Kelimpah ari nya, pengawa betuchuk vaksin AstraZeneca ngagai volunteer lanchar dipejalai ba Sarawak pengelama dua hari tu tadi,” terang iya.

Ku Kui Hian, penyampau nya nambah ngelui ari 3,000 sehari.

Suara Sarawak