TUAK nya sebengkah ai pesaka bansa Iban ti tau ngasuh mabuk sereta suah dibantai lebuh bisi pengerami.

Nya nyengkaum Pengerami Gawai Dayak, Krismas, Taun Baru, melah pinang, mangkung tiang enggau ti bukai.

Nya alai, sebulan sebedau ngintu Pengerami Gawai Dayak, bansa Iban endang udah kiruh begagaka tuak kelimpah bemacham bansa kuie enggau kasam.

Kebuah pia laban ai tuak meseti dibantai dikena ngintu Pengerami Gawai Dayak kelimpah dikena bebuti enggau pangan diri.

Pia mega, ai tuak beguna amat nyadi ke ai pengayu ti diirup maya tengah malam 31 June kelai Hari Gawai udah datai seraya nyampi minta diri gayu panjai umur nguan menua.

NGAGA CHIPING

Kebendar, tuak nya digaga ari asi pulut ti dilunyau ngena chiping tauka ragi ti digaga ari lengkuas enggau tepung berau.

Lengkuas nya tadi ditutuk nyentuk tenyuh lalu dilunyau ngena tepung berau sebedau dichampur ngena chiping bukai.

Chiping bukai nya tadi endang chiping ti udah tembu digaga sebedau tu tang ditutuk tenyuh dikena nyampur chiping ti deka digaga nya.

Pengudah tiga bansa perengka nya tadi dilunyau sebela, dia deh kitai lalu berengkah ngaga tukuh chiping.

Gaya tukuh chiping nya bepanggai ba kitai empu sekali ke nya segala, kempik tauka bisi gaya bukai.

Udah nya, tukuh chiping diteju semalam nyentuk kembai sebedau dijembi ba pengelama lima hari tauka seminggu bepanggai ba gaya hari.

Chiping nya meseti dijembi rangkai ngambi ai tuak ti digaga kitai ngena chiping nya enda masam.

NGAGA TUAK

Pulai baru ngagai cherita ngaga tuak tadi, asi pulut ti udah dilunyau ngena chiping patut ditaruh ba tong ti engkeman baka tong kacha, plastik, benda enggau ti bukai lalu diteju ba pengelama berapa hari tauka seminggu.

Pengudah berapa hari, asi pulut nya tadi deka bebali nyadi asi manis lalu berengkah mansutka ai manis.

Asi manis nya ulih diempa lalu pengasai asi nya endang manis baka ti udah dilunyau ngena gula.

Lebuh asi pulut nya udah bebali nyadi asi manis, dia deh kitai patut nuang ai amat ngagai tong nya.

Udah nya, kitai berengkah nuangka gula nitih penyukup enggau nambahka baru chiping ngagai ai dalam tong nya lalu girau nyentuk gula lela.

Ungkup penerang, mayuh agi chiping dikena kitai, bisa agi ai tuak nya enti udah nyadi ila.

Pia mega, enti kitai ngena tong kacha, kitai patut ngengkah tong nya ba teluk tauka dibap ngena utai bukai dikena nyeliah ari kena panchar mata panas laban nya ulih ngasuh ai tuak masam tauka rusak.

Enti pengawa nya udah tembu dikereja, teju tauka peram asi pulut ti udah dichampur ngena ai, gula enggau chiping ba pengelama berapa minggu tauka sebulan dikena ngasilka ai tuak.

Urung berapa minggu udah nya, ai tuak pen nyadi lalu ulih diirup tang sebedau nya, kitai patut mantis dulu ai tuak nya kena muai rampang asi pulut.

Ai tuak ti udah dipantis nya patut disimpan ba tong tauka butul ti udah disedia sereta ulih dibantai.

Nemu kita? Majak lama ai tuak nya disimpan, majak chiru enggau bisa agi ai tuak nya.

REVOLUSYEN TUAK

Enti kelia, ai tuak nya endang digaga ari asi pulut aja tang kemaya hari tu bemacham utai ulih digaga ke tuak lalu nya bepanggai ba pengelandik enggau kreativiti sesiku orang.

Nya nyengkaum bemacham bansa buah baka anggur, buah naga, epal, nanas, jagung enggau ti bukai.

Pia mega, bisi tuak digaga ari bungai enggau daun baka bungai Roselle, bungai ros, bungai Telang sereta daun pandan enggau ti bukai.

Pekara nya chukup manah dikena ngerembaika pesaka ai tuak bansa kitai ngambi enda punas disegang pemansang kemaya hari tu.

Ai tuak ti digaga ari buah, bungai enggau daun utai tumbuh nya ukai semina ngembuan bemacham pengasai tang ngembuan chura ti bebida sereta manah dipeda.

Pia mega, bisi sekeda orang ngaga tuak ngena ‘yis’ iya nya sebengkah kereban dikena ngaga kuie dikena nyilih chiping.

Kebuah pia laban ba mengeri besai baka Kuching, Bintulu enggau Miri chukup pedis kitai deka tetemu ke orang nyual chiping.

Chara ngaga tuak ngena ‘yis’ nya kurang lebih baka chara ngaga tuak ngena chiping tadi.

Kemaya hari tu, pengawa ngaga tuak nya mujur ngerandang dagang ngagai kitai bansa sereta mayuh peminta.

Ai tuak ukai semina dikerindu bansa Dayak aja tang bela dikerindu basa bukai nyengkaum ari menua luar.

Nya alai, begempung meh kitai ngetan, nampung enggau ngerembaika ai tuak tu lalu rebak dudi patut belajar chara ngaga tuak ari sida ti tuai.