ARTIKEL

Watt Enjup begunaka sukung belanja dikena ngarika Malaysia ke USA

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

KUCHING : Watt Enjup iya nya siku artis Iban ke kala bulih midul emas ba pekit Malaysian Championship Performing Arts diatu benung begigaka belanja tauka sponser dikena nyereta pekit seni ba renggat entarabansa.

Berekat ari pemujur nya, Watt enggau anak iya Darren Mengga ti ngena nama ‘Father and Son’ deka dipilih ngarika Malaysia ba World Championship Performing Arts (WCOPA) ke deka diatur kena 22 Julai 2022 di Disneyland, Callifornia, Amerika Syarikat (USA).

“Aku besampi ngagai Petara ngarapka taun baru semua perambu pengawa ke deka digaga kami ulih bejalai enggau mujur.

“Ngiga pemujur endang bepun ari baruh. Berengkah ngujika nasip ba menua asal diri lalu enda disadang pengawa nya tejapaika pemujur ba menua asal diri.

“Bekau ari nya, Puji Tuhan, diatu aku enggau Darren udah dipilih ungkup nyereta pekit ke lebih besai ba tikas entarabansa ngarika tim Malaysia,” ku Watt.

Watt Enjup enggau Darren Mengga.

Nangkan ke nya, Wat madah taja timpuh endur bepekit nya agi lama tang kebendar nya peluang dikena belatih enggau nyikap diri ari mayuh sukut lebih agi ngaduka semua pengurang.

“Kami duai kin ila endang mai nama Sarawak enggau Malaysia. Nya alai, arapka semua rayat di menua tu terus nyukung enggau besampika pemujur kami duai menyanak,” ku iya.

Nangkan ke nya, ku Watt dianggarka ungkus penuh dikena ngambi bagi ba pekit tu iya nya RM39,406 tauka (USD9,500). Enti suba, semua ungkus tu dipelanja raban komiti pengatur tang serak tu dipinta nyendiaka ungkus kediri ketegal pangka pandemik Covid-19.

Berebak enggau nya, Chairman Gerempung Armada Anak Seni Sarawak (Aras) meri pengaga ati ngagai Watt Enjup enggau anak iya Darren Mengga laban udah dipilih ngarika Malaysia ba pekit tu.

“Aras pechaya Watt enggau Darren ulih mujur ba pekit tu laban seduai iya menyanak endang dikelala bisi pengelandik ba pengawa bemain muzik.

“Kelimpah ari nya, Watt empu siku ari penanyi tebilang kitai Iban. Aku ngarapka raban bekaul ulih meri sukung ari segi belanja dikena seduai menyanak nyapai juluk sereta teulihka pemujur ba pekit tu,” ku iya maya dirandau Ruai, Suara Sarawak, kemari.

Ungkup penemu, WCOPA tu sebaka tikas enggau Olimpik iya nya deka ngempuruka raban anak seni landik ari serata dunya mandangkan pengelandik diri.

Logo pekit
Logo pekit

 

Chairman Aras, Gibson Rentap

BERITA LAIN

BERITA TERBARU

PM Thailand disahkan positif COVID-19

BANGKOK, Thailand: Perdana Menteri Thailand, Srettha Thavisin, mengesahkan semalam bahawa beliau positif COVID-19. Srettha mengumumkan di akaun rasmi X miliknya bahawa beliau akan mengambil cuti

Tulisan beracun

MATA pena lebih tajam daripada mata pisau. Sama seperti pisau yang dapat digunakan untuk mengukir, alat yang sama juga dapat digunakan untuk membunuh. Pisau dapat

Zii Jia juara Terbuka Australia

KUALA LUMPUR: Pemain perseorangan lelaki profesional negara, Lee Zii Jia meraih gelaran kedua musim ini selepas  merangkul kejuaraan Terbuka Australia 2024 dengan menewaskan wakil Jepun