TEPERANSANG enggau penemu ke dikunsika bala bakih ti mayuh peneleba ba dagang kuih ngujungka minat dua indu ari Tamin terus nguji ngepun bedagang kuih gelang tauka donut lalu diatu pengawa nya udah nyadi nyata.
Winney Imba, 31 enggau Marylin Yapit, 18 berengkah bejalaika pengawa ngaga kuih gelang ba pun bulan Ogos tu tadi lalu entara kuih gelang keterubah digaga iya nya bansa ke bechura enggau kek cheese.
“Tua iya mayuh betanya ngagai kaban ti endang bedagang utai diempa lalu semampai nguji resepi ti digiga ba sebelah media rama (Facebook).
“Kami duai mega bisi nguji masuk kelas begaga kuih bebayar nengah media rama dikena nambahka anak penemu enggau peneleba,” ku Winney.
Bela asal ari Rumah Keroh, Tamin, dua indu tu ngerejister dagang seduai iya ngena nama W&M Kitchen.
“Beduduk ari peminta ke majak nambah ngujungka kami duai ransing agi bejalaika pengawa nyual donut ti bemacham chura enggau kek cheese leleh.
“Bepun ari deka nguji belubah-lubah dia enda berasai pengawa tu nyau majak dikerindu tambah mega nyau nyadi pun penatai pemisi.
“Ari resepi ti udah di belajar ba media rama enggau kelas online dia asil nya bisi dibantai ba media rama. Enda nyangka mega timbal ari pemeli chukup manah, diatu orang majak mayuh ngelala dagang kami duai,” ku tandu Winney.
Seraya ke nganti peluang nampung belajar sepengudah tembu SPM ba taun 2020 tu suba, kaban kunsi Winney iya nya Marylin madahka diri begunaka awak ti bisi tu dikena belajar bedagang enggau pekara ti meri penguntung ngagai diri iya empu baka belajar ngaga kuih.
Udah nya Winney madah, entara pemakai manis ti suah agi diudar mensia mayuh iya nya donut berchura.
“Rega donut dijual nitih pemesai enggau penyampau ti dipilih pemeli urung RM15 ngagai RM20 sekutak lalu kek cheese leleh berega RM12 siti.
“Diatu peminta ari pemeli ukai semina ari menua Tamin tang mega datai ari luar Tamin..
“Naka ke diatu, pemeli bisi nya ari sitak Selangau, Sekuau, Sebintek enggau Batu 20,” ku Winney.
Seduai madahka, proses ngaga donut enggau kek cheese nya begunaka awak urung sehari lalu bagi sapa ke deka ngudar kuih donut tu ungkup pengerami ulih madah tumu dalam dua tauka tiga hari sebedau sida beguna.
W&M Kitchen bisi nyediaka servis nganjung donut tauka (COD) terus lalu rega nitihka penyauh.
Berebak enggau nya, Winney besampika dagang seduai iya Marylin terus mujur.
“Terima kasih ngagai orang mayuh ke udah kala meli donut berchura enggau kek cheese sereta semampai nyukung tua iya ngelama tu” ku iya.
Barang sapa deka ngudar tauka nguji nyepi kuih gelang digaga W&M Kitchen tau betelefon terus nuju lumur 0112-9501449 kelimpah ulih meda sebarang penerang ke pemadu baru ari akaun Facebook Marylyn Yapit.
