Wong Pelagus mengkang nyadi ‘mimpi rawan’ ngagai peranak Batang Rajang, Belaga

KAPIT: Wong Pelagus siti wong ti mar ditengah perengka pengangkut ai sereta diketakutka mensia mayuh kelebih agi peranak Batang Rajang enggau Belaga.

Nyentuk sehari tu, Wong Pelagus agi nyadi ‘mimpi rawan’ peranak tu lebuh betengahka ai Batang Rajang mansa wong tu lebuh mulai kediri ke menua tauka undur ke pasar Kapit sereta jalai alternatif ke Belaga tauka Bakun kelimpah betengahka kerita nengah jalai alun ari Bintulu.

Wong Pelagus tu mega ngembuan jerita ke udah mayuh ditusi ari mulut ke mulut peranak asal ke semak enggau wong tu kelebih agi orang ke tuai suba.

Kenu ku sekeda jerita, semengat ke bisi ngibun wong tu agi ngiga ‘orang’ nya alai ninting taun peranak asal ditu nganjung piring pengampun ungkup semengat ke bisi ngibun wong tu.

Wong tu mega bisi dikaitka orang tuai suba enggau jerita siku Nabau, ular ti besai ke bebali nyadi siku mensia lalu nguntik siku indu ti mega bini siku orang ke berani ba genturung tu kelia suba.

Wong Pelagus

Pengawa Nabau ke nguntik bini iya tu tadi udah ditemu iya lalu nangkap Nabau tu tadi sereta didengah iya lalu dikerat ngagai tujuh bagian.

Tujuh bagian kerat tubuh Nabau tu udah ditikau iya tu ngagai wong tu.

Beduduk ari nya, Nabau ke pedis ati udah didengah iya tu lalu nyumpah deka nagih ‘seput’ anak mensia ke betengah ke wong Pelagus tu.

Nya alai, kitai ulih meda tujuh buah batu ke ngelingi wong tu diberi nama Wong Lapoh, Wong Pantu, Wong Batu Naga, Wong Sukat, Wong Batu Kawie, Wong Nabau enggau Wong Tilan.

Entara taun 1970 pia diak pakar ‘letupan’ udah nguji nganchurka batu ba wong tu ambika ulih ngemanahka jalai ai ditengah mensia mayuh ba wong tu tang siku ari raban pakar letupan bisi bebadi nyawa ngujungka nadai siku agi berani deka nganchurka batu ba wong tu nyentukke sehari tu.

Kelimpah ari nya, wong tu udah kala ngaramka express enggau perengka pengangkut ke bukai lalu bisi kala nabanka seput kelebih agi enti mua hari enda entu manah tauka ujan.

Lebuh ditanya pengarang berita, Dorina Mangie,24 taun peranak Rumah Sadang, Sungai Metah endang betengah ke wong tu ngena perengka pengangkut sungai baka ekspress ke menua diri.

“Enti lebuh nengah wong tu, sigi ngengam semengat seagi empai ngelimpas wong ti mar tu,”

“Dalam ati anang ngira endang sigi becampur aja utai diasai ari takut nyentukke mayuh runding deka dipikir,”

“Lebuh hari ujan, tu mih pekara paling ditakut kami ke betengah ke wong tu laban ai sungai ulih pasang ngenyit ari ulu,”

“Tu ngasuh ai ba wong deras,”ku Dorina

Dorina madahka tu nadai bida entara batu udah dibom enggau apin kala dibom taja pan enda kala ngasai betengah ke wong tu ke apin kala dibom sereta tetap ngenakutka ati.

Iya madahka tiap nengah wong tu ati endang meruan besampi ngagai Tuhan ambika nyangkung pejalai sida nengah wong tu sereta arapka pengelikun diri.

Wong Pelagus tu selalu ditengah peranak Belaga, Punan Bah, Peraran, Nanga Sama, Metah, Nanga Merit, Pila sereta rumah panjai ke bukai ba Batang Rajang ke mansa wong tu mudik tauka undur ngagai pasar Kapit.

Kelimpah ari nya, ba baruh kaki wong Pelagus tu bisi sebuah resort ke udah lama ditinggal enggau enda dibuka ngagai mensia mayuh.

The Pelagus Regency Resort sebuah resort ke ngembuan jerita nadai entu pengamat ditusi orang mayuh nama kebuah resort tu enda dibuka ngagai orang mayuh agi.