SELANGAU: Wong Penyuan ba Ulu Selangau tau bendar diangkat nyadi siti palan dagang temuai.
Kaban Kunsil Nengeri (Adun) Tamin Or Christopher Gira Sambang madah, wong tujuh ringkat tu bela dikelingi rampa menua ti manah bendar ke tau matak temuai datai.
“Nya alai, aku ngarap Opis Kaunsil Menua Pesisir Sibu (SRDC) mantaika penemu dikena ngangkatka wong Penyuan Ulu Selangau tu nyadi palan alai nemuai ngagai Opis Menteri Dagang Temuai.
“SRDC tau ngenataika keretas kereja dikena minta belanja ngaduka endur tu nyadi siti palan dagang temuai bepelasarka pemanah rampa menua kelimpah wong tu empu,” pia ku iya madah.
Dulu agi ari nya iya nyempulang SRDC ti betuaika Kaunselor Sempurai Petrus Ngelai bejalai nemuai ngelawa wong nya, ensana.
Berebak enggau tu, Gira minta mensia mayuh ke diau ba menua nya bela ngetanka pemanah rampa menua dia ngambika mengkang manah dipeda nyentukka ila-ila.
Iya ngarap bala mayuh enda ngereja pengawa ti tau ngenyati pemanah rampa menua tauka kampung ba dia.
Ba pekara bekaul, iya andal SRDC mengkang bejalaika pengawa nyidi mayuh agi endur ti tau diaduka manah agi nyadi palan endur nemuai.
Ambika banding ku iya, baka di menua tungga ke Ulu Balingian, Ulu Mukah, Pakoh enggau Ulu Oya.
