WTF nganjung 4 penyereta ba Litar Taekwondo 2019

SIBU: Gerempung Taekwondo Bumi Kenyalang (WTF) udah nganjung empat iku penyereta ba Litar Taekwondo 2019 (Junior enggau Senior) diatur Gerempung Taekwondo Nengeri di Universiti Teknikal Melaka kena bulan April apin lama ke udah.

Empat iku raban iya nya Yong Chen Lin, Gordan Wong Shou Hon, Tu Wen Jing enggau Fatin Shazlina Jonnie.

Tu Wen Jing mujur bulih midul emas dalam kategori indu ba baruh kategori 73 kilogram, ditangkan Fatin Shazlina Jonnie bulih midul engkerajuk ba baruh kategori 38 kilogram.

Mandal Chairman Gerempung Taekwondo Nengeri (PTNS) Dato Sri Lau Kueng Chai madah berasai temegah enggau penyulut raban iya seraya madah kededua raban ti menang midul nya ngembuan peluang nyadi pemain ba renggat nasional.

“Aku ngarap, semua raban belatih ransing agi ngambika ulih ngarika Sarwak tauka Malaysia ngagai renggat nasional kelebih agi di Sukma, Lumba Asia enggau Lumba Olimpik, pekara tu patut nyadi juluk ati genap pemain,” ku iya ngagai media pengudah nyuaka insentif ngagai bala pemenang, kemari.

Gerempung tu mega deka nganjung 20 iku kaban nyereta pekit kangau basa ba Universiti Nilai ke 22 enggau 23 Jun, sereta Litar Taekwondo Junior enggau Senior taun tu di Kelantan.

Gerempung Kenyalang Taekwondo Bumi Kenyalang mega deka nganjung bala raban iya nyereta Chun Cheon Taekwondo Korea Open G2 kena 4-10 Julai.

Naka tu, pekit tu deka digulu lebih ari 60 buah menua enggau 2,500 penyereta udah ngerejista diri.

ARAP TERUS MUJUR …(dari kiba) Pengajar Latih Chiew Mee Lin, Yong Chen Lin, Fatin Shazlina binti Jonnie, Dato Seri Lau, Tu Wen Jing, Gordan Wong Shou Hon enggau pengajar Wong Ing Sing begambar ungkup kenang.