ARTIKEL

NGABAS… Yusuf Abdul Wahab nemuai ngagai SK Orang Kaya Muda Pakeri Paloh matau gaya begunan sekula nya, kemari

Yusuf asa isu sekula apin diputar

Facebook
Twitter
LinkedIn
WhatsApp
Telegram

SARIKEI: Kaban Parlimen Tanjong Manis, Ir Yusuf Abdul Wahab madahka diri asa pengudah begunan Sekula Primari (SK) Orang Kaya Muda Pakeri Paloh dikenukuka enda likun dikena.

Iya madah, pekara nya enda patut nyadi laban sekula nya baru 11 taun udah digaga lalu nyadi siti palan pelajar ti nangkup guna nembiak belajar ba sitak nya.

“Pekara tu (dikenukuka enda likun dikena) lalu udah dikenuku raban forensik Opis Kereja Raya (JKR).

“Struktur begunan nya mega bisi rusak ti tau dikira balat. Tu pekara berat lalu meseti diberi perati lengkas,” ku iya.

Yusuf mansutka jaku nya pengudah ngatur penemuai ngagai palan sekula nya, kemari.

Dulu agi ari nya, iya bepeluang mendingka licha senentang penanggul nya lebuh betemu enggau kepala pengajar sekula nya.

Ba lansa bekaul, iya minta JKR bejalaika atur lengkas dikena ngelala pun penyadi penanggul nya ti ulih ngeruga pengelikun peranak sekula dia.

“Aku bisi dipadah, diatu sekeda begunan bukai ba sekula tu udah dikena ba pengawa nyilih begunan kelas ti enda ulih dikena agi baka buding lelaki, buding indu enggau kantin buding.

“Aku mega ngarap raban Opis Menteri Pelajar Malaysia (KPM) naka ulih nyendia tauka ngaga kabin begunan kelas sementara dikena ngengkahka bala nembiak sekula tu,” ku iya.

Ngelansa senentang perambu ngaga begunan baru, Yusuf madah, pekara nya patut diberi perati dikena nentu pengawa ngajar enggau belajar ungkup rebak biak ba Paloh lanchar sereta menyana.

LAIN-LAIN BERITA

BERITA TERBARU