SRI AMAN: Sapit Menteri Besai, Datuk Patinggi Zahid Hamidi ngelalu raban tuai Gempung Parti Sarawak (GPS) ulih mantu ngenegapka agi politik di menua tu maya Pengawa Bepilih Besai Nengeri (PRN) ba enam buah nengeri di Semenanjung Malaysia ti deka datai.
Menteri Pemansang Menua Pesisir enggau Wilayah nya madah, penegap politik di Sarawak betuai ke Premier Sarawak Datuk Patinggi Tan Sri Abang Johari Tun Openg ke ngembing semua komponen parti dalam GPS patut nyadi teladan enggau dichunto nengeri bukai.
“Penegap politik ditu patut dititih ba renggat Perintah Besai, kelebih agi kami deka napi PRN laban gendang udah ditebah, kelalu mayuh isu ti dipetalat enggau penemu ti ayan diatu.
“Nya alai, kitai patut ngerembaika penerang ngagai rayat ngambi enda nyadi berita sebubu ngapa ti ngirauka ati ketegal penemu sekeda tuai ti ngembuan juluk tinggi lalu nguji ngajum rayat awak nyukung sida,” ku iya.
Zahid bejaku munyi nya rambau Pengerami Ngiling Bidai Gawai Dayak ba Balai Suarah Sri Aman ditu, tadi.
Ku iya, rayat patut nemu milih ni intan enggau kacha laban ba gaya diatu, bala pengundi ba enam buah nengeri nya meseti pintar runding.
