KUCHING: Ex-Senator Datuk Zaiedi Suhaily, 68, mujur angkat sumpah nyadi Sapit Datuk Bandar Kuching Selatan sereta meri jamin bekerejasama nyendia servis ngagai komuniti lokal.
Ku iya, kerejasama semua orang nyengkaum raban pengatur pengawa renggat tinggi enggau pegawai pangkat baruh beguna amat ngambi tanggungpengawa ulih dipejalai enggau meruan.
“Aku pechaya penyulut ba sebuah organisasyen endang beguna ke kerejasama ba bemacham serak nyengkaum datuk bandar, sapit datuk bandar, kaban kaunsil, pegawai enggau ti bukai.
“Pia mega, kitai patut bekerejasama enggau kaunsil mengeri bukai baka Dewan Bandaraya Kuching Utara (DBKU), Kaunsil Mengeri Padawan (MPP) sereta Kaunsil Mengeri Kota Samarahan (MPKS) dikena ngamat Greater Kuching,” ku iya.
Zaiedi mansutka jaku nya rambau aum pemberita pengudah angkat sumpah nyadi Sapit Datuk Bandar Kuching Selatan ba begunan MBKS ditu, sehari tu.
Nya alai, iya bela ngemerat komunikasyen nyadi kunchi ngagai pengasi ukai semina dalam organisasyen tang komuniti lokal.
“Komunikasyen beguna amat dikena ngenatai sebengkah pekara. Enti bisi saru penemu, penanggul deka nyadi tang ulih meri pemereti ati ngagai komuniti enti sebengkah pekara dikenatai ngena chara ti semitan,” terang iya.
Datuk Bandar Kuching Selatan, Datuk Wee Hong Seng madah, Zaiedi ti ngembuan mayuh peneleba deka mantu ba pemansang sitak nya dudi hari.
“Nengah kerejasama semua, kitai deka chakah bejalaika pengawa ngambi komuniti ulih dibantu ukai semina ba sukut infrastruktur tang ba mayuh sukut,” ku iya.
Pengawa nyiri Zaiedi nyadi Sapit Datuk Bandar Kuching Selatan dikena nyilih Hilmy Othman ti mujur dipadu nyadi Datuk Bandar Kuching Utara empai lama.
