Zon 1 ngagai Zon 7 di Sibu PKPB

SIBU: Pemutus aum Komiti Penyangga Penusah Bagi Menua (JPBB) Sibu kemari ngerah Atur Mindah Betagang Belebas (PKPB) tambah deka dipejalaika ba Zon 1 nyentuk Zon 7.

Tu mungkur sitak Sukun /Lada, Mantis, Poh Yew, Bukit Lima, Tong Sang, Puak Mengeri Sibu enggau sitak Tiong Hua.

JPBB madah staf opis perintah ti bejalaika pengawa enda ibuh minta permit ari polis, sida tau mandangka surat gawa ari pengaji.

“Ungkup apai indai ke nganjung anak ke sekula mega enda ibuh minta permit, tang nyema anak bisi lebih tiga iku dalam entukar, sida patut madah ngagai penerit adat ti gawa.

“Udah nya ungkup raban nyelai pendiau (OKU), orang tuai sida dikemendar mindah enti bisi kebuah berat,” ku penerang nya.

“Kelimpah ari nya, orang ke diau ba luar tujuh zon nya lalu deka masuk zon ke udah dirintai sida mesti minta permit ari polis,” ku iya.

Berebak enggau nya, JPBB Sibu madah sekeda premis dikemendar dibuka ungkup serbis beguna.

“Tu mungkur opis perintah, opis bekanun, penyaga mensia mayuh, institusyen wang/insuran.

“Pia mega ulih dibuka iya nya kedai kereban ganti entukar, servis pengerai baka klinik enggau farmasi, kedai ubat China, nyengkaum servis nerima enggau ngepos barang baka Opis Pos enggau ke bukai, ditangkan industri ke dikemendar opis menteri bekaul,” ku iya.

Ku iya mega tu mungkur kedai nyual barang guna ninting hari enggau pemakai sereta servis telefon.

“Kedai makai dikemendar dibuka lalu semina diasuh bejual tapau aja,” ku iya.

Kedai bukai ke enda tau dibuka diatu iya nya palan refleksologi, spa, rumah urut, bistro enggau karaoke, ditangkan kedai guntin, saloon, kedai nyual kerita, kereban elektrik, kedai gari, perabut, kereban sekula, palan nuchi kerita enggau kedai lumur.

Suara Sarawak