KUCHING: Bisi 224 iku anak ti ada di Sarawak direjister nadai ngembuan peranak menua bagi timpuh Januari ngagai Ogos 2026 nitihka rikod ari Opis Pengerejister Bansa (JPN).
Menteri Pemansang Indu, Nembiak Mit enggau Pengelantang Komuniti, Datuk Seri Fatimah Abdullah madahka bisi sekeda batang pekara penanggul ti ngasuh anak mit ti ada tu direjister ukai peranak menua tauka diberi surat pengada bechura kalas di Malaysia.
“Entara pekara tu iya nya pengawa tikah apai indai ti enda direjister tauka enda ditukuka nitihka undang-undang menua Malaysia.
“Kelimpah ari nya, indai ti nadai dokumen pengelala diri ti diaku mega nyadi kebuah nembiak nya direjister ukai peranak menua tu,” ku iya.
Fatimah bejaku munyi nya lebuh nyaut tanya ari Kaban Kunsil Nengeri (ADUN) Engkilili, Johnical Rayong Ngipa ba Aum Kedua Penggal Kelima Kunsil Nengeri (DUN) Sarawak ba Kompleks DUN, ditu, tadi.
Kelimpah ari nya, iya madahka anak mit ti ditemu tauka dibuai mega disengkaum dalam kategori begunaka pengawa ngerejister dikena nentuka status peranak menua iya nitihka undang-undang ti bisi.
