SIBU: Bisi 33 projek sakit ba baruh Opis Menteri Pengerai Mensia Mayuh, Pengawa Berumah enggau Perintah Lokal udah dikelala ba taun 2023.

Sapit Menteri nya, Datuk Michael Tiang Ming Tee madah, penyampau nya nurun ngagai 31 projek ba bulan Januari 2024. Iya madah, nya mai reti dua ari 33 projek sakit nya mujur diputar sereta udah tembu.

“Taun tu, aku nyelinting deka mutar isu projek sakit tu.

“Enti aku madahka projek nya ‘sakit’, reti nya projek nya agi dipejalai lalu agi bisi pengandal deka tembu,” ku iya.

Tiang mansutka jaku nya rambau dirandau pemberita pengudah Program Ngelalu Pengabang Taun Baru China ba rumah iya empu ba Jalai Terap ditu, malam ensanus.

Dulu agi ari nya, iya dipinta ngelansa senentang tagit opis menteri sida ba taun tu. Taja pia, iya madahka projek sakit nya semina napi penanggul teknikal ti patut diputar.

Ngelansa pekara bukai, Tiang madah, opis menteri sida deka ngelanchar roadshow dikena ngelakuka tribunal pengawa berumah strata ba selampur Sarawak.

“Roadshow nya dipejalai dikena meri penyedar ngagai rayat Sarawak lebuh sida meli rumah, sida bisi akses ngagai tribunal pengawa berumah.

“Ungkup sida ti meli reta diempu strata, beguna amat sida nemu bisi mega tribunal ngempu strata khas ti udah disedia,” terang Kaban Kunsil Nengeri (ADUN) Pelawan nya.

Ku iya, tribunal ti baru ditumbuh nya endang dilangkar dikena nyaga hak penguna sereta patut ditemu mensia mayuh ba selampur nengeri.

Ngelansa senentang pengerami ngelalu pengabang nya, Tiang pechaya semangat penyerakup ti dikembuan komuniti kitai deka ngempung kitai begulai ngintu bemacham pengerami ba nengeri tu. Iya madah, semua kitai patut ngintu pengerami nya begulai enggau lantang seraris juluk nempa Sarawak maju manggai taun 2030.

Berebak enggau pengelantang rayat, iya andal Sarawak ulih nyapai juluk besai nya enti rayat ba nengeri tu terus negap penyerakup sereta seati nadai ngira raban bansa enggau pengarap.